成日都睇到啲妹豬嘅男友投訴，話幫妹豬影相點辛苦，其實你估啲妹豬陪你哋去影風景相又好舒服咩？同一個地方、同一樣嘢都要用唔同角度影19幾次，企喺側邊真係少啲耐性都唔得呀！

所以話，成功嘅龍友背後最好梗係有個識欣賞佢嘅女友，咁先唔會因為影相搞到成日嗌交吖嘛。但係，如果除咗陪你之餘，仲出力幫你手影靚相，係咪更加令你滾動呢？

呢幅相望落又幾有Feel喎，大地在我腳下，好似準備瀡落條瀑布咁，呢啲叫咩呀 ？型囉～雖然呢幅相自己拎相機都影到，但係對腳嘅角度都唔係咁易就㗎。只要個壆位窄啲，對腳都會條條揈咁，做唔到自然垂腳嘅效果㗎！呢個時候⋯⋯背後嘅女友要出手喇 ！

佢居然為咗令男友影到幅完美嘅腳相，出力咁托住佢個Pat Pat同條腰呀！真係太令人滾動喇，平日睇男友瞓埋落地下幫女友影相就多，女友幫男友咁樣影相都係第一次見咋！難怪連行過嘅路人甲都話要幫佢哋影低呢個嘅咁溫馨嘅毛文啦～

不過你哋唔好以為男朋友淨係識自私影，其實佢都同妹豬一齊影咗好多靚靚放閃相㗎～好彩毛毛今次帶定副黑超啫！

其實講到尾，龍友想搵個陪佢影相嘅女友；機迷就想有個陪佢打機嘅女友；球迷就想要個陪佢睇波嘅女友，而毒L⋯⋯只係想有雙手以外嘅女友咋。

封面圖片及資料來源：loserlorena／twitter