情境題，如果你嘅仔女係同志，你可以包容佢哋嗎？噚日就講咗Ginny嘅感人故事，今日就轉一轉角色。毛毛搵咗花蓮嘅亮萱阿姨，唔知已經為人母親廿幾年嘅佢，對同志平權又有咩睇法呢？毛毛同佢傾完偈，好想即刻返香港見下媽咪～嗚……

妳認為同志有冇權利結婚？

亮萱阿姨就對同志婚姻冇特別支持或者反對，佢話兩個同性喺埋一齊係冇問題嘅，但社會認為小朋友係家庭扮演好重要嘅角色，萬一同志講到要有下一代，例如想生BB或者領養嘅話，就會覺得怪怪der～

佢話自己由細到大對屋企嘅定義都係一男一女，而佢只係怕會影響到同志下一代嘅價值觀。佢覺得同性戀拍拖可以單純出於愛，但要講到結婚後嘅問題就複雜得多喇。毛毛都明嘅，因為亮萱阿姨已經有一個好似毛毛咁大嘅女，一提到同志婚姻就會諗到下一代嘅問題都好正常～

妳覺得台灣歧視同志嘅情況嚴重嗎？

亮萱阿姨話以前未開始講同志平權嘅時候，大家都會笑男同志做娘娘腔，不過而家就幾乎唔會聽到。其實作為上一代嘅亮萱阿姨，一開始都會覺得男扮女或者女扮男嘅人好奇怪。

但係，見到越嚟越多男仔會留長頭髮，同時有越嚟越多女仔傾向中性打扮，亮萱阿姨講笑咁話：「不知道是社會生病，還是基因上發生甚麼事 ，但我發現越來越多這樣的人。」感覺就好似過往嘅性別定型大兜亂咁。佢仲話，感覺國外嘅同性戀者都係比台灣嘅低調。其實亮萱阿姨係一個專門載遊客嘅的士司機，佢話近年同志乘客越嚟越多，由起初見到會覺得怪怪哋，到而家就會覺得冇問題～

毛毛插嘴話，喺台灣真係好容易見到彩虹旗，甚至連地下都會見到爭取婚姻平權嘅字眼。亮萱阿姨就覺得彩虹旗係要提醒大家要尊重同志，佢認為尊重真係好重要，就算好難做到和平，但至少可以減少好多衝突。

好多人覺得「人家的孩子可以是同志，只要不是自己孩子就可以了」，妳有咩睇法？妳係唔係呢種人呢？

亮萱阿姨帶點無奈咁講：「對啊！做父母的一定沒辦法接受。」佢話相信每一個父母都唔會希望仔女係同性戀，但如果仔女同自己告白，都要學習去包容。佢話為人父母都希望自己嘅仔女開心，而唔係畀人歧視，所以作為愛仔女嘅爸爸媽媽，唔可以帶頭歧視佢哋。亮萱阿姨仲話，做咗媽咪成廿幾年，都覺得自己包容身邊人嘅程度大到難以想像。聽到佢話「只要身邊的人快樂，我都可以犧牲。」任性嘅毛毛頓時覺得父母真係好偉大！嗚嗚嗚～

後記

其實亮萱阿姨係毛毛喺花蓮嘅包車師傅，喺旅程途中佢一直分享佢同老公嘅溫馨故事。毛毛不停大叫好sweet好sweet！ 仲有佢帶毛毛又睇花，又睇海，又睇稻田，又怕毛毛餓，又怕毛毛口渴。喺短短嘅旅程已經感受到佢嘅母愛。相信做佢仔女，一定又幸福又開心！