做人最緊要係咩呀？梗係活在當下啦！嗱，好似以下呢位84歲婆婆咁學下點做YouTuber，咁咪肯肯定會每日都過得既充實又開心囉！

是咁的，話說台灣有位叫「快樂姊」嘅YouTuber。佢見自己嘅婆婆每個星期除咗洗腎之外都好似冇乜特別嘢做咁，於是佢就決定教婆婆拍片，仲幫婆婆改咗網名叫「快樂嬤」，等婆婆可以搵到新嘅人生目標同價值。

而快樂嬤當然好樂於接受呢個新挑戰啦，佢仲話自己要挑戰連續90日出片，叫大家call齊fd子一齊睇佢啲片?！喂，阿婆叫到，大家唔係唔捧場下話？

雖然快樂嬤就唔會好似平時啲YouTuber咁拍打機片、化妝教學、淘寶開箱乜乜乜呀咁，但快樂嬤啲片都好精彩㗎！一時教下網民整撚手小菜、一時拍下小遊記、一時又拍下vlog，啲內容都不知幾豐富！

不過咁，婆婆始終都有腎病，洗完腎再拍片會唔會攰得滯頂唔順㗎？

快樂姊就表示，雖然快樂嬤有時洗完腎再拍片都會覺得攰，但當佢知道大家鍾意睇佢拍嘅片嗰陣，佢就會好有滿足感！咁當然，假如快樂嬤真係太攰嘅時候，就算快樂嬤想拍，呢位乖孫女都一定會阻止佢啦，所以大家唔使擔心～

資料來源：6YingWei快樂姊／YouTube