而家啲美肌App愈出愈強勁，唔只可以點一點就執走暗瘡、推一推就練成小蠻腰，仲可以幫你化妝，真係一App在手，人人都係女神呀！不過呢啲App淨係幫女神呃兵仔，好唔公平啫！唔使怕，而家就有個叫「Makeapp」嘅女神剋星，就算佢化到個妝幾濃，都可以還原佢素顏個樣喇！

今時今日，就咁搵啲女星相嚟睇素顏效果係未夠㗎，毛毛仲搵埋佢哋嘅堅・素顏照嚟做個對比，睇下呢個App嘅還原度有幾高，信唔信得過！

測試一：Emma Watson

話Emma Watson係女神相信都冇乜人會反對㗎喇，不過一用卸妝App就……好彩Emma係鬼妹仔，輪廓夠晒深，都仲認得佢係邊位嘅～

睇返Emma嘅堅・素顏照，好明顯成個樣精神好多啵，人哋話笑容係一個女仔最好嘅化妝品，睇嚟係真嘅。

測試二：Angelababy

Angela嬰兒就算落咗妝都有個純天然下巴仔同超高嘅鼻，輪廓都夠贏呀！Btw，而家係落妝喎，做咩幫佢個嘴唇加色呀？

呢張係之前Angela嬰兒去北京醫院驗証自己有幾天然嗰陣影嘅，總之就係……好天然咁樣樣囉。

測試三：阿嬌

可能原圖嘅阿嬌個妝比較濃啦，用卸妝App執完都幾大分別！不過個黑眼圈就好似假咗少少啵！

阿嬌出咗名素顏都一樣咁靚女，你睇佢做完運動出咗身汗個樣都不知幾精靈，邊有卸妝App嗰張咁殘啫！

測試四：智孝

有人話智孝可能係韓國最後一個冇整容嘅女星，咁講梗係可能誇張咗啦，不過如果話智孝係個化濃妝定淡妝都咁好睇嘅女星，相信冇乜人會質疑呀！用卸妝App執完，都係靚女一個！

睇返堅・素顏照，皮膚又白又滑，其實真係想點素都得啦……

測試五：唐寧

大家都睇住佢大，睇住佢咁多年都keep住童顏～呢張用卸妝App執完嘅相睇落梗係覺得怪怪地，未必可信！

呢張係唐寧最近post嘅生活照，不過毛毛真係睇唔出同而家播緊套低清劇入面個唐寧有咩分別。到底點解可以十年嚟個樣都冇老過㗎？

總結

強行落咗妝，個樣都真係幾大對比㗎，不過女神丁圖唔可以盡信，卸妝App都一樣唔可以盡信啫！咁多位兵仔想睇下娘娘真身先決定入唔入伍嘅話，都係信佢六成好喇！