天口一熱，啲蛇蟲鼠蟻就走晒出嚟，又係時候要捉蟲喇！唉，你估捉蟲咁易㗎？想佢哋上當，你估仲好似以前咁放嚿餌就得咩⋯⋯起碼都要棟返個牌仔話畀人聽呢度有嘢食先吖！仲要頭一兩次唔好殺佢哋，放返佢哋返屋企，等佢哋帶埋姨媽姑姐過嚟開餐先一網打盡吖嘛！

呢位老友仲醒呀！佢考慮到一班工蟻好似我哋人類咁日做夜做咁辛苦，成日OT，放啲消閒娛樂嘅嘢入去一定吸引到好多蟻民自投羅莽啫！

首先介紹，索蟻艷舞團！平日返工咁辛苦，睇下艷舞Relax下都好應該啫～咩話，工蟻通常都係雌蟻？邊個話艷舞一定要女人跳㗎，咁女人又唔可以鍾意睇女人跳艷舞嘅咩？你理得人咁多吖，反正人哋都冇份交配⋯⋯

如果係正經蟻家唔鍾意睇人跳艷舞嘅，又或者想收埋自私睇咁點先？咁咪趁百蟻達執笠掃定一堆平貨，咩《蟻后的秘密生活》呀或者《弊傢伙，蟻竇有色魔》咁囉，仲有災難紀錄片《滾水淥蟻》，全部做緊特價喎！

係啵，唔記得班蟻放工仲要買餸煮飯?！呢排興食得健康，一於整個24小時有機街市，專賣Organic嘢啦！咁咪放工幾夜買餸都唔驚囉～越夜越有機吖嘛！

但係網友忘記咗最重要嘅事，話明蟻民，邊識字啫！好彩臨尾都醒起要開返間《蟻民青學習中心》，仲提你哋嚟咗呢度先好去其他地方?，真係Kind of Sweet呀～不過未入去學又點睇得明呢間係學習中心呢下？就喺毛毛好質疑個成效嘅時候⋯⋯

居然真係有蟻民入去睇艷舞呀！網友就拍低咗第一位顧客幫襯嘅神聖毛文喇！有其他網民就話，你誤會咗喇，佢嚟見工㗎咋⋯⋯唉，而家搵食艱難，做蟻民嘅，唔搵多一兩份Part Time點儲錢移民吖，唔通做死一世工蟻咩？點估到會墮入求職陷阱先得㗎⋯⋯

Btw，溫提下考完試搵緊暑期工嘅考生，記得小心啲，唔好好似呢位蟻民咁，中咗人圈套都唔知呀！

封面圖片及資料來源：tastefactory／twitter