有養寵物嘅人就知，有時養寵物真係好似多咗個仔女咁㗎，特別係啲好嗲嘅貓貓狗狗，一見唔到主人就冇晒心機，仲會扭計唔肯食嘢，真係擔心死主人喇！

咪以為得人類先有分離焦慮症，其實貓貓狗狗都有㗎，例如呢隻狗Millie咁，一見唔到主人就會好Down，搞到茶飯不思咁㗎喇！但係主人要出去工幹，又唔可以帶埋你去，咁點算呀？

主人個女試過叫老竇打電話返嚟，諗住開Speaker畀Millie聽下主人把聲可以慰藉下佢相思之苦啦。點知反而搞到Millie仲Sad咗呀！

阿女諗到頭都爆埋，終於畀佢諗到，人寂寞就可以攬個吹氣公仔，咁幫狗狗整個人型公仔咁咪得囉～於是阿女就將老竇個樣印出嚟，跟手黐落啲舊公仔度喇！

呃⋯⋯大佬，黐還黐吖，唔好揀個咁挑逗嘅樣得嘛？你仲要黐落派大星度搞到老竇露咁多點，你叫老竇以後點見人喎⋯⋯

雖然啲公仔係粗製濫造咗啲，但係Millie又真係粗粗地用住先，仲用得好冧咁?啵。咁就得啦～最緊要都係用家滿意啫。

見到Millie開心返，主人兩父女就安樂晒喇～如果你哋嘅BB或者寵物有分離焦慮都不妨可以試下呢個方法啵！

封面圖片及資料來源：the Dodo