大家平日Cap圖Cap得咁開心，證明睇嘅戲都唔少啦～有啲睇到都應該識背㗎喇，既然係咁，今次加深少少難度，睇下冇咗字幕，仲打埋格仔之後你哋仲認得幾多！

Level 1 古惑的字幕

若隱若現嘅字幕，係咪好想整走啲格仔佢呢？睇慣格仔嘅人都應該練成透視格仔嘅功力㗎啦，而家就試下你有幾叻！

呢題分明就係送分㗎啦，毛毛都介紹過㗎啵～咪臭係每次畀腦細同豬隊友激完都要同自己講一次嘅： 「呢個世界真係美麗，啲空氣真係清新喇～」，好唔好啲呀？未好呀？成套《超級學校霸王》睇一次，笑餐飽之後會好啲㗎喇。

呢題就難少少，因為少啲人用吖嘛。畀個貼士你嘞，你睇下佢個樣，似咩呀？有咩嘢係成堆草喺個頭度㗎？唔係行路草呀，你估玩Pokemon咩⋯⋯答案係：「望咩呀老坑，未見過蘿蔔呀？」，係呀，《97家有囍事》入面星爺話自己Cosplay緊蘿蔔㗎喎，好似係。

Level 2  消失的字幕

哈哈哈，今次連字幕都冇埋，睇你哋點估！

畀個易啲嘅你，睇下星爺呢個性感嘅咀型，睇唔睇得出佢係想講咩字呀？諗唔起就跟住佢一齊嘟長個咀仔，發下音，睇下係咩字啦～畀多個大貼士你，佢想講嘅係一個戲名呀！咪係《醉拳甘乃迪》即係《南拳北腿孫中山》嘅下集囉！

呢幅又係經典中嘅經典！究竟孖膶腸嘅偉仔呢個毛文會講啲咩呢？呢度係講偉仔教學友溝女嘅，咁佢呢個表情係問咩呀？問咗三次㗎喎！係嘞，「勁唔勁呀？」，毛毛唔係問你我勁唔勁呀，係講緊呢條題個答案咋。

Level 3  冇面畀

得喇，知你哋叻喇，連無字幕都識，而家連個樣都唔畀你睇，就唔信咁都考唔到你！

雖然得肢體語言，但咁明顯嘅動作，應該唔難認得㗎啫，你要跟住佢做呢個動作，跟住催眠自己⋯⋯「我要殺死丁力呢個＿街！」，係咪呀！咁咪講咗出嚟囉！

仲有呢個係咩呀？拎住個花灑，一朝早淋花就唔會向住自己啦，你咩時候會將個花灑頭向住自己呀？咪係唱歌囉～唱到最後⋯⋯我不知道⋯⋯「冚＿剷！」，講咗答案喇？係呀，早晨。

Level 4 矇了吧如無意外

對手實在太強勁，毛毛真係冇眼睇喇！打晒格仔睇你哋仲點睇？

呢題就算打格仔都難唔到你哋啦，啲顏色好似漆黑中嘅螢火蟲一樣咁鮮明，咁出眾⋯⋯因為呢句說話，係好多打工仔嘅心聲⋯⋯「食屎啦你！」，嗱嗱嗱，毛毛絕對唔係想同腦細講㗎下⋯⋯

唔好成日掛住鬧人，出返啲開心啲嘅Cap圖啦～好似呢幅咁，見到兩Pat色，係咪好熟呢？係呀，兩個人嚟㗎，仲拎住啲白白哋嘅嘢?～嚟，我哋一齊唱～「恭祝你福壽與天齊，慶賀你生辰快樂」～Hey～去下一題～

最後一題終極考驗！呢題畀你哋估到嘅話⋯⋯咁又點喎～呢句對白大家都好鍾意用㗎，你知啦，睇人＿街最開心，特別係對住自己最憎嘅人，「呢鑊你仲唔冚＿剷？」呢句說話真係寧舍好用呀！

如果以上有好多題你都估唔到，咁你係時候要進修下，睇多幾套戲喇～識晒嘅朋友都唔好驕傲呀，咁只係證明呢啲戲同對白真係好深入民心，大家已經熟到齋睇顏色都認得喇⋯⋯唔知十年後，仲係咪有咁多人記得呢啲對白呢？

封面圖片及資料來源： 電影《超級學校霸王》截圖、電影《97家有囍事》截圖、電影《家有囍事》截圖、電影《射雕英雄傳之東成西就》截圖、電影《上海灘賭聖》截圖、電影《賭俠》截圖、電影《旺角卡門》截圖、電影《整蠱專家》截圖、電影《鹿鼎記2神龍教》截圖