有睇過《BB保你大》嘅都知啦，日本嘅幼稚園當正班媽咪係手作高手咁，一時又要繡個名喺校服度，一時又自己整表演道具，真係少啲心思都唔得掂呀！

日本嘅媽媽都好興幫小朋友喺幾乎所有布藝用品上面都加個得意燙章仔嘅，但呢對白布鞋就唔同喇，竟然有隻媽咪親手畫嘅貓仔啵！隻貓仔仲要斷開一半，個頭喺左腳，條尾就喺右腳，到底點解要特登畫隻斷身貓咁驚嚇呢？

原來媽咪唔係想嚇阿B，而係提佢唔好將對鞋左右調轉著呀！如果你都有睇過小丸子，又會知多樣嘢喇，日本嘅學生返到學校之後都要換對白飯魚嘅，不過對白飯魚設計比較簡單，就好似酒店拖鞋咁，唔細心啲都分唔到左右㗎，所以媽咪就特登畫隻貓仔，等阿女見到一隻完整嘅貓仔，就知道冇著錯囉！

呢個方法都幾好啵，不過香港嘅媽咪就未必用得著喇，又要帶小朋友學西班牙文又要帶佢學非洲鼓，邊有時間畫公仔吖……

娘の上履きに。昨日仕入れた左右間違えずに履けるアイデアやってみた！
キャラクターつきの上履きはNGだから、やった後で心配になってきたけど、表じゃないから大丈夫……だよね？(^_^;) pic.twitter.com/VLS45tYhDK

— 綾姫 (@ayahime02) June 11, 2017

封面圖片、資料來源連結：ayahime02／twitter