結婚相好彩就話一世人影一次吖，畢業相就唔同喇，影得愈多愈好，學士一次碩士一次博士又一次，不過就算畀你讀到上去，相信影得最癲最開心嘅，點都係得學士嗰次㗎咋，所以真係要好好珍惜你嘅青春小鳥呀！

個個影畢業相都係拎住張沙紙笑到梗晒咁嘅樣，好冇特色啫，唔係睇你條色帶都分唔到你讀咩系呀！咁樣對唔對得住你個教授呀！嗱，中山大學呢班同學仔就唔同喇，一睇佢哋張畢業相，就肯肯定佢哋係讀哲學系呀！

呢幅名畫叫做《雅典學院》，將唔同時期嘅哲學家畫埋一齊，作為哲學系畢業生，點都要跟住嚟影一次嘅！牆上面嘅係阿波羅同雅典娜石像，同學仔仲打大赤肋扮佢哋，夠晒誠意呀！

講起哲學家，最多人識嘅應該就係蘇格拉底喇，咁名畫《蘇格拉底之死》你又見過未先？呢班同學仔都扮得幾似、幾入戲㗎，個胳肋底。

除晒衫披住件畢業袍扮哲學家呢啲嘢，唔啱女同學做嘅！女子組一於就扮《最後的晚餐》啦！每位同學嘅手勢同表情都學到足㗎，連畢業相都影得咁認真，真係想像唔到佢哋寫論文會有幾強呀！

見到呢班同學仔一齊夾手夾腳影哲學系專屬畢業相，真係令人覺得好青春！好滾動呀！不過呢，最滾動都係有其他同學諗到毒L可以扮咩名畫囉，早知毛毛當年都影返張《吶喊》啦……

封面圖片、資料來源連結：dcard