啲妹豬聽到男朋友話為咗畫張生日卡畀佢而捱咗成晚通宵，或者為咗用ukulele彈首生日歌畀佢而練咗成個禮拜，就即刻感動到口水鼻涕一齊流，實在太傻豬豬喇！男朋友都係你今世情人啫，你老竇就由你做佢上世情人開始愛你愛到今世喇！外國呢個爸爸為咗個女嘅高中畢業禮物而準備咗足足12年，係咪仲值得感動先？

美國呢個廿四孝爸爸由阿女Mackenzie返小一嗰年開始，就每年開學日都會幫佢拍片，訪問下佢當日心情點樣，返學有咩好玩，連續拍咗12年，拍到今年阿女18歲高中畢業，就剪埋一齊，將呢條成長記錄片送畀佢當係畢業禮物喇！

12年前嘅阿女6歲，返學對佢嚟講係一件好新奇嘅事，話畀爸爸知今日喺學校油顏色同寫字嗰陣都不知幾興奮呀！

二年班嗰年，佢就話畀爸爸知佢同個會影相做樣衰樣嘅女仔一齊坐喇～

三年班，佢識咗個一樣都叫做Mackenzie嘅女同學呀！雖然呢啲聽落都係小事，但阿女就當係好重要嘅事咁要話晒畀爸爸聽，真係好有童真呀～

愈嚟愈大個女，講嘅話題都愈嚟愈成熟喇，四年班嗰年，阿女就爸爸講開學日派嘅功課只係個開始，第日仲會愈嚟愈多咁話啵。

升上初中，即係踏入青春期啦，爸爸都話開始覺得難同佢做訪問喇。唔通真係咁快就女大女世界，唔想同爸爸傾偈偈？

阿女咁多年嚟，好似都發福唔少，爸爸一定好錫佢，好驚佢餓親個肚仔喇！不過一升上高中，阿女就成個人唔同晒，婷婷玉立喇！佢仲唔怕話埋畀爸爸知佢最緊張嘅就係喺班上搵個cute boy?，睇嚟同爸爸關係都唔錯！

小一同小二差唔多，小二又同小三差唔多，不過咁樣將12年嘅片段擺埋一齊睇，就見到阿女好明顯大個咗好多，由細路女長大成人喇。最後爸爸仲將每年同佢講嘅「I love you」由畢業開始倒數播返轉頭，好似象徵爸爸會一直好似當初咁愛佢，當佢細路女咁照顧，真係睇到有啲眼濕濕……

睇完成個故仔，又唔係做女又唔係做老竇嘅毛毛明白到一個大道理，就係唔好笑身邊每一個肥妹仔呀，佢哋分分鐘都係潛力股……

封面圖片、資料來源連結：Kevin Scruggs／YouTube、Daily Mail