而家呢個年代，人人都可以係正義（或者正義魔人）嘅化身，見到有人唔讓座？影佢放上網啦！見到有人打尖？影佢放上網啦！最近台灣都有個網民影咗隻狗狗放上網，話懷疑有人虐畜啵。

狗狗嘅耳仔畀人釘咗七粒鈕咁多呀！一定好痛頂喇，養得狗狗就應該當佢係自己小朋友咁錫，點可以令佢受痛苦呢？到底個主人點解要咁做呢？

當大家都好擔心狗狗受到虐侍嘅時候，真相終於揭開喇！原來呢種係治療「耳血腫」嘅方法嚟㗎。咁乜嘢係耳血腫呢？狗狗搲痕或者揈頭嘅時候，有可能會搞到血管破裂，血液流到耳朵皮膚同軟骨之間嘅空腔，就會腫起一嚿㗎喇。

醫生幫狗狗清咗耳仔入面嘅凝血塊之後，就會縫針，幾星期之後狗狗就可以返去拆線㗎喇。縫針嘅時候加多粒鈕，可以平均把腫脹壓制，對狗狗身體唔會構成影響，大家可以放心！

唔少網民都叫post相話懷疑有人虐畜個樓主下次google下先好話人，其實都係嘅……不過相信佢都係出於關心狗狗啫，大家就原諒佢啦～

封面圖片、資料來源連結：Yen-Min Wu、獸醫小助理一點都不日記