有人話過，我哋玩IG係為咗令自己睇上去生活得好好，毛毛都幾同意㗎，唔係點解會有咁多人喺IG post相曬命啫！有拍拖咪曬幸福囉，有錢嘅，咪曬下自己幾有錢囉！最近英國《太陽報》報道，有個叫「richkidsofhongkong」嘅IG，集合咗唔少香港二世祖嘅炫富相呀，等毛毛帶大家睇下呢種我哋冇機會接觸嘅生活啦！
又制水真正受氣～又制水的確係無謂～呢位生活水平疑似停留喺60年代嘅哥哥仔因為制水，只能夠用香檳沖涼。如果佢早出世幾十年，或者有機會成為一代歌神。
一般二世祖由於備受溺愛，日常生活大小事都有工人照顧，所以缺乏獨立能力。將多隻名錶是但求其馬虎套喺酒樽度就當擺好，正係唔識收納之道嘅表現。
二世祖都可以有清泉嘅，呢位千金小姐用名貴包包袋住狗仔出街，一物二用，響應環保。
有得揀，先至係老闆，但太多選擇，對某啲人嚟講又係一種煩惱。呢位小姐行李袋同行李箱揀埋同一款pattern，相信可以免墮選擇困難症之地獄。
講到香港出名千金，又點可以唔提何鴻燊寶貝女何超蓮呢？不過毛毛嘅專注力已經放晒喺Leonardo唔識串身上……
最surprise嘅係，竟然連Fisherman Lok都有份上榜！為免大家誤會，毛毛必須重申多次呢堆相係由「richkidsofhongkong」集合出嚟，唔係毛毛自己搜集㗎下！毛毛都唔明點解Fisherman Lok都會係二世祖或者Kid㗎！只能夠話真係估唔到原來打魚都可以致富呀下！欽敬欽敬！
A post shared by Rich kids of HONG KONG 香港?? (@richkidsofhongkong) on Oct 27, 2015 at 10:15pm PDT
封面圖片、資料來源連結：richkidsofhongkong／instagram、英國《太陽報》
