曾經有長輩話過，入醫院只係入廠維修下啲零件啫～冇事嘅！其實好多人入醫院最擔心嘅都唔係自己，而係佢身邊嘅屋企人同毛孩呀！特別係自己啲寵物，真係見少面都會心掛掛㗎⋯⋯

美國有個妹豬嘅嫲嫲就係因為入咗醫院見唔到狗狗，所以好唔開心呀⋯⋯但係病人要保持心境開朗，咁先會快啲好㗎嘛～所以妹豬就諗咗條計仔氹返嫲嫲嘞！

就係好似攬仔咁攬住狗狗入醫院，搏啲人當狗仔係BB，咁咪可以偷運狗狗入去囉～有冇咁易呀？一陣狗狗唔聽話周身郁，或者唔小心叫咗一聲咁咪穿晒崩？

好彩，唔知係咪狗狗都咁想見到主人呢，所以佢全桯都好乖好聽話。

於是就畀妹豬成功帶到狗狗入去醫院喇！你睇佢個樣幾得戚？不過咁都畀你諗到，係抵你得戚嘅～

嫲嫲見到狗狗不知幾開心，即刻攬到佢實一實，望落仲好精神?！果然見到親人同食藥一樣咁有效呀～希望嫲嫲快啲好返，咁咪可以光明正大咁攬實自己嘅毛孩囉！

有啲人話妹豬呢個舉動好似唔多合衛生喎⋯⋯但係其實呢間醫院都有畀服務犬入去嘅，所以如果妹豬事前事後做足清潔，都未必係好大嘅問題。話晒可以令老人家開心嘅機會，真係唔多㗎⋯⋯

封面圖片及資料來源：HennickShelby／twitter