通常大家一聽到廢墟就會諗到MV，或者覺得好猛鬼，不過毛毛知道香港有一班人好熱衷影廢墟嘅人。今次毛毛飲咗杯壯膽酒之後，就跟咗「5.76億的世界」嘅版主阿海去咗一間算係比較完整嘅廢校，同佢做咗個專訪。（你哋唔好諗住叫毛毛話你知點去啊，阿海話唔講得㗎。其實佢都係想保護呢個地方，個個都去打卡就唔好啦！lur地都冇用㗎啦！平身平身～）雖然嗰日又熱又多蚊，但阿海都好熱情咁同毛毛分享廢墟攝影嘅驚險同感動過霎時感動嘅故事。 嗚～好滾動呀！

裡面嘅枱枱凳凳仲好完整

相信每個學生都好憎嘅校務處～

唔知大家有冇印象呢？

「媽咪！我想入呢個廢墟睇下～」

嗯！毛毛一開波訪問，已經覺得阿海好特別，膽超大，咩都唔怕。原來佢由細到大都對廢墟就有小小嘅情意結。佢一邊笑一邊話細細個坐車經過長沙灣屠房都會好想入去，唔係因為想去睇血淋淋嘅畫面，而係單純覺得爛到淨低窗框、又有好高圍牆圍住嘅屠房好神秘。佢仲話小學嗰陣已經成日幻想自己學校變成廢墟會點，而毛毛……就淨係會幻想學校點先會變靚啲。

「順個便，不如入去睇下～」

阿海雖然細細個就對廢墟情有獨鍾，但講到真正入廢墟，其實只係一年前左右嘅事。阿海前年半夜上山影風景，影到清晨落山，見到附近有個廢墟軍營。「見仲咁早，就順便入去睇下！」佢傻下傻下入咗去，仲傻下傻下咁畀看更發現，但好彩走得甩。佢話嗰陣對影廢墟未有超級大興趣，就連相機都未識用。（毛毛一定信㗎喎～）就係咁阿海就去咗第一次嘅廢墟。事隔半年，阿海同朋友勇闖荒廢片場，就係呢次令佢對廢墟興趣大增。之後佢不能自拔到每逢星期六日放假都會出擊，仲誇張到一日去成三四個廢墟先滿足。毛毛返一至五已經攰到hihi，星期六日真係要有大勇氣先會出街囉……

「嚇死我咩？嚇到心都跳埋出嚟！」

毛毛講到阿海好似好輕易就入到廢墟咁，但其實佢唔係每一次都咁順利。阿海話有一次喺廢墟影影下相，聽到遠處有著拖鞋行路嘅聲，仲feel到越來越近。（阿海即場跳起身，案件重演比毛毛睇）當時阿海同拖鞋看更隔住一塊板，但其實只有一步距離。佢話最驚嘅唔係見到看更，而係突然比佢嚇一嚇，真係心肝脾肺都冇埋。阿海仲話朋友試過畀警察包抄，有盾牌，又有警犬。所以就話呢，入廢墟要冒嘅風險真係好大。嗰次就話慈母大恩大德放過佢哋，下次可能就冇咁好彩㗎喇。大家聽下就算啦，唔好學啊，知冇？

「其實我哋對眼就係嗰部5.76億嘅相機～」

阿海話「5.76億的世界」嘅5.76億其實係人眼睛嘅像素。「你可以話我懶有詩意，但我真係有諗過㗎！」佢話開呢個page除咗想啲相多啲人睇，多啲like，仲想有個地方將啲相排得整整齊齊。咁點解唔係開個page淨係講廢墟呢？阿海話自己唔係純粹鐘意廢墟，而係鐘意影相，廢墟只係攝影中嘅過程。佢仲話呢個page，可以幫到人去一啲佢哋去唔到，或者懶得去嘅地方。「我就代佢地去啦！」阿海面露每次睇海賊王經典對白「出發吧！向著偉大航路！」嘅表情。（年輕真好，好熱血啊！）

「多謝你將我啲相變得更有意義」

阿海話每次影完廢墟，都會好想將批相畀番佢地嘅「主人」。就好似影完廢校咁，佢會上網搵返啲舊生page，再share返輯相畀佢地，畀佢哋重拾回憶。不過佢嘅做法唔係個個人都受，特別係啲攝影同好，話佢做咩公開廢墟地址。不過阿海話：「呢啲回憶，根本就係屬於佢哋㗎嘛！」佢話有一次，有網民inbox佢話想要長沙灣屠房嘅相 。一問之下先知，原來佢想了解下已經去世嘅爸爸以前嘅工作環境。阿海話突然覺得好有使命感，仲加快手腳執相，隔一日就即刻出post。

毛毛後記

舊生重遊舊地所題嘅字

毛毛約到阿海做訪問當然好開心，個訪問仲可以喺廢墟做，真係興奮到想喺office開爆仗慶祝呀（啪啪啪！）。阿海喺訪問中好照顧我呢個廢墟新手，當然包括開路開燈、同我訴說小學回憶啦。訪問途中，佢行到入其中一個班房，就讀起黑板上嘅字 ，佢仲話見到呢塊黑板就令佢最有感覺，唔講仲以為啲字係佢寫。但其實啲字應該係啲舊生，喺人生路上經歷咗好多，再重遊校園緬懷過去時寫嘅，大概係話好掛住以前返學嘅美好時光～其實近年香港嘅廢墟越來越多，有好多地方本身都有商業價值（例如：東薈城戲院），但話拆就拆，話要發展就要發展。香港發展得太快，人們都遺忘得太快，好彩香港仲有阿海呢班人用相幫大家重拾回憶～ 唔知阿海影過嘅地方，又有冇充滿住大家嘅回憶呢？ （毛毛默默點頭）