做政客真係要好小心㗎，特別係開會嗰陣，雖然普通打工仔開會嗰陣都可能會恰下眼瞓或者玩下電話咁，但係話晒你哋人工高咁多，就算係做其他嘢都唔可以太過份嘅，一陣畀市民睇到就唔好啦～

不過有時幾小心，都好難避得過豬隊友嘅「神助攻」嘅，啱啱13號係英國國會嘅第一次會議，咁大件事啲議員梗係要打個卡，順便側面show下自己幾唔妥隔籬黨咁啦。

喂阿姐，影相單聲得唔得？未Ready好喎！咩未Ready？前面位手足部電話未Ready呀！幅相一Post，大家都忍唔住問，究竟呢位阿哥睇緊咩呢？

放大少少睇，好似好多肉色咁啵！唔通佢好似我哋某位尊貴嘅議員咁，見出面夏日熱辣辣，所以要睇返啲著得好清涼嘅女女降下溫？

有另一個網友就試下加強啲顏色，睇下可唔可以搵到多啲線索嘞。跟據毛毛多年鑽研愛情動作片嘅經驗同埋對人體嘅學術性研究，呢張相入面嘅⋯⋯係女嚟㗎喎！哦！你衰喇，開會睇女，我話畀老師知！

呢個時候有正義嘅網友走出嚟，話真相只得一個，女就女喇，但係件事笨唔係你哋諗咁㗎！

佢仲Post咗張100% match嘅原圖畀大家睇?，真係有女喎，不過望落唔多似係呢個年代喎。唔通而家連丁圖都興復古？

網友話，其實呢幅圖係一個歷史Page嘅Post嚟㗎，呢個Page成日都會Share啲有返咁上下歷史嘅靚相，嗰位議員應該係開會碌下Twitter，咁啱撳咗呢個Post嚟睇就畀後面隊友影低咗喇。果然唔怕神一般嘅對手⋯⋯

好彩今次有網友神速搵個真相出嚟咋！唔係呢位政客真係水洗都唔清呀！不過就似乎有唔少跟車太貼嘅網友炒咗車喇⋯⋯

封面圖片及資料來源：Anna_Soubry／twitter​、RedLeftAndy／twitter、NickyRyan／twitter、DieZauberer／twitter