結婚呢家嘢，望就梗係望一世人得一次啦⋯⋯因為結一次已經夠煩喇！又要訂酒席、排期、印帖，仲要影結婚相喎，最慘嘅係新娘子成日都話想要特別啲結婚相，大佬呀，而家已經搞到上山下海咁喇喎，你仲想要幾特別呀？

其實影婚紗相都唔一定要去到天涯海角咁先夠特別嘅，搵一個對兩個人都有特殊意義嘅地方都唔錯㗎～好似新加坡呢對新人咁，居然畀佢哋諗到一般人都唔會諗到去影婚紗相嘅地方呀！

就係Apple Store喇！原來佢兩個都係蘋果迷，所以對於佢哋嚟講喺Apple Store影就Perfect池嘞！但係老老77，話晒都係人哋做生意嘅地方，人哋畀唔畀你咁影先？

呢對新人就特登喺開舖前半個鐘去到Apple Store，喺一班兄弟姊妹又哀又篩之下，蘋果員工終於通融喺開舖前畀10分鐘時間佢哋影婚紗相嘞！果然唔止果有果味，仲好有人情味呀下～

於是一對新人就攞正牌喺Apple Store度大影特影，盡情放閃喇。你哋兩個都唔諗下啲員工嘅感受嘅，特別仲係單身狗嘅朋友⋯⋯平日返工見住啲情侶都算啦，而家睇你哋影婚紗相，好似畀人嘲笑緊這些機會永遠不屬於你咁呀！

「喂阿May，係咪你呀？」

「Hi，just to say hi～」

「不如你一陣抱我上呢條樓梯吖～」

「唔L係呀⋯⋯」

影到咁上下佢兩個就一齊步向教堂，Sorry，係步向Apple Store嘅門口先啱，係眾蘋果產品嘅祝福同加持底下，步向幸福美滿嘅人生嘞。雖然睇片見到其他人最初有啲唔知發生咩事咁，不過之後大家都有一齊拍掌起鬨㗎！

但係唔知點解毛毛好似隱隱約約聽到員工嘅心聲係⋯⋯「你哋快啲走啦，我哋唔想搞大件事呀⋯⋯」

封面圖片及資料來源：Mashable