上到天堂邊個會想落地獄呀⋯⋯有得揀大家都想做個廚神，而唔係廚房嘅瘟神啦。不過地獄廚神想洗底仲難過黑社會呀⋯⋯事關你啲fd會一直重複重複又重複咁提起你嘅戰績，除非你可以整返餐似樣嘅出嚟啦！

煮食教學？毛毛細細個就聽過啦，雞蛋六隻，糖呢兩茶匙吖嘛～

Excuse me，兩茶匙？茶匙即係邊隻呀？「一啲橙皮」又即係幾多呀？

唔使驚，有呢張紙咪得囉！Ikea新出嘅呢張嘢咁多形狀，其實就係畀你逐件食材放上去，咁咪唔會量錯份量囉～

仲要主要食材都可以喺易key牙度搵到，一個字，方便！最正嘅係將啲嘢撈埋一齊就上得碟，咁咪唔怕有意外囉！

大家最關注都係衛生嘅問題，話晒又墨又紙咁，點食落肚呀？放心，啲紙係煮食紙，上面啲墨都符合食物安全標準㗎！不過可惜喺加拿大廚房節先有得拎啦⋯⋯毛毛介紹得就梗係諗咗解決方法啦～

一於就叫個識整嘢食嘅朋友，用食用色素印返百幾二百份呢啲有晒份量嘅食譜喺啲牛油紙度，分分鐘仲可以5蚊份賣畀啲地獄廚神，簡直商機無限呀！

Any肥，諗諗下都係爭啲⋯⋯好似呢啲放之前要煲要烚嘅嘢⋯⋯對於地獄廚神嚟講已經係膠難度動作，仲未計佢哋識唔識分啲材料喎。都係喺上面寫返初學者需於家長指引下使用好⋯⋯

封面圖片及資料來源：Boredpanda