有邊個毒L可以成日潛水之餘，皮膚又黃仲成面月球坑都仲有咁多女鍾意呀？咪臭係海綿寶寶囉！公平咩！仲要有啲女女話就係鍾意佢夠腦殘喎⋯⋯唉⋯⋯

唔知呢位網友係咪同毛毛一樣咁葡萄海綿寶寶，所以佢居然將海綿寶寶同派大星真人化呀！哈哈，睇你哋呢班話海綿寶寶係真愛嘅人睇完仲係咪咁講！

嗚哇，咁嘅樣嘅海綿寶寶，毛毛接受唔到囉！唔知仲以為係睇緊百變星君呀⋯⋯國字面型都冇理由國成咁下化！仲要學人三點盡露呀！你諗咗去邊呀，露咗三粒暗瘡坑咋。

不過好彩佢唔係完全忠於原著，如果唔係海綿寶寶塊面咪變蜜蜂竇咁！想嚇死有密集恐懼嘅朋友仔咩！（雖然而家都唔好得幾多⋯⋯）

呢個唔係派大星嚟嘅，你呃人！嘩⋯⋯啲鬆弛嘅肉肉再加埋啲皺紋，真係睇到都想喊呀⋯⋯佢仲要擺個咁Chok嘅表情出嚟，想點呀？有網友話，佢似足以前《非常小特務》嗰隻「手指指」喎⋯⋯邊似啫，人哋有著衫㗎！

兩個好朋友放埋一齊都唔好得幾多⋯⋯加埋個燈光，好似睇緊恐怖片咁呀。不如加返少少道具，望落開心啲咪會好啲囉～

當毛毛冇講過⋯⋯加埋手套氣球同帽只係令個氣氛更詭異咗⋯⋯Molamola⋯⋯睇完呢堆相真係回不去喇。唯有OT完返去睇返兩集卡通版平衡下心理啦。

封面圖片及資料來源：ArtStation、電影《百變星君》截圖、電影《非常小特務》截圖