話說，早前有港爸帶小朋友行玩具展嗰陣就去咗會展一間餐廳食Lung廚。呢位爸爸叫咗一碟福建炒飯同一碟炒貴刁，不過當碟炒貴刁送到嚟嘅時候，小朋友就因為碟炒貴刁係辣嘅，所以食唔到。而當呢位港爸叫職員換碟唔辣嘅炒貴刁嘅時候，職員就表示傳統嘅炒貴刁係辣嘅，所以冇得換畀佢喎！於是呢位港爸咪嬲嬲豬，喺會展個Facebook Page度留腐皮囉！

弱弱一問，點解呢位港爸唔自己食咗碟炒貴刁佢，然後讓碟福建炒飯畀小朋友食嘅？再講吖，其實打包返去都好過嘥咗佢下話？

而會展關公喺收到投訴後就回覆話，職員當時已經建議換碗魚蛋河畀呢位港爸，又提議過送熱湯同叉燒包畀佢，只係佢唔接受咋啵⋯⋯

睇到會展關公嘅回覆，呢位港爸都即刻留返一大段comment嚟反駁，話職員從來冇同佢講過可以換魚蛋河喎！佢仲話自己將隻碗仔反轉擺上碟炒貴刁度，仲要接近埋單嗰陣，啲職員先識得問要唔要送個包畀佢?⋯⋯

最後，既然大家喺呢件事上面有咁多誤會，會展關公就決定叫呢位港爸留電話，直接同佢聯絡嘞。

資料來源：Hong Kong Convention and Exhibition Centre（已del post）、Open Snap