嗱，玩6個鐘啤牌大家都可能試過啦，但疊足6個鐘啤牌，大家又試過未呢？試過，呢位台灣網民真係試過！

話說，最近有台灣網民就同大家分享佢疊啤牌嘅嗜好。呢位網民話喎，佢細細個就鍾意疊啤牌㗎喇，只不過幼稚園嗰陣道行未夠，淨係疊得6層啤牌，但經過多年嘅苦練，佢而家已經可以疊到20層啤牌喇！

嘩嘩嘩，啲啤牌疊到成20層咁多，咁咪用咗好多時間囉？係呀，呢位網民話佢足足用咗6個幾鐘嚟疊呢個有20層嘅啤牌金字塔㗎！而且疊嘅時候仲需要極度專注，因為一個不小心，就要由頭開始過㗎喇！

疊完個啤牌金字塔有成功感，一嘢撞散個啤牌金字塔仲有成功感呀⋯⋯

btw，除咗呢個有20層嘅啤牌金字塔之外，其實呢位網民仲可以將啲啤牌搭成好多唔同嘅形狀㗎，就好似十字形同圓柱體咁啦～嗚哇，疊啤牌都可以疊到咁出神入化，仲邊有人夠你玩呀？

資料來源：dcard