游水最正～游水最正～夏天去沙灘游水兼嬉水就梗係正啦，不過見到個沙灘一地垃圾，又玻璃又膠樽呀咁，真係咩mood都冇晒呀⋯⋯其實見到咁多垃圾，不如幫手執起佢吖，除咗幫到地球，話唔定仲有意外驚喜㗎！

呢啲一塊塊畫咗隻海龜仔喺上面嘅嘢咁得意，咩嚟㗎？唔通係畀啲人玩片石仔用嘅？定係用嚟壓住啲紙嘅紙鎮嚟呢？毛毛知喇，梗係玻璃糖嚟嘞，一定係，除非唔係！

原來呢啲係台灣小琉球海湧工作室用喺海灘執到嘅玻璃整成嘅「海灘貨幣」呀！叫得做貨幣，就梗係可以用嚟買嘢啦～

咁點先得到呢啲貨幣呢？唔通要以物易物，用港幣嚟換？物就係物，不過係廢物呀！用垃圾就可以換到當錢用嘅貨幣？有冇咁筍呀？

嗱，唔係你幾時去小琉球都有得換㗎，係要參加佢哋一個叫「愛龜淨灘接力賽」嘅活動，一齊幫手執海灘上面啲垃圾，完咗活動之後會秤返你哋執到嘅垃圾重量，每2kg就可以換一個貨幣，每人就最多可以換5個。

跟住就可以拎住呢啲嘅貨幣去有響應活動嘅店鋪消費㗎喇～睇佢列出啲店名，吃喝玩樂有齊晒，正呀！不過呢啲貨幣咁靚，叫人哋點捨得用喎～

如果唔想去親旅行都係得食嘢Shopping，想做啲有意義嘅嘢，不妨7月尾參加下呢個活動，話唔定啲台妹台仔見到你咁落力為環保，會主動過嚟識你?啵！

封面圖片及資料來源：中時電子報、海湧工作室 - Hiin studio