影結婚相聽落好似只係兩個人嘅事咁，其實未必㗎，得兩個人，影嚟影去咪又係得攬下鍚下咁，多一個人就唔同呢，多好多玩法㗎嘛！

美國呢對新人，就決定搵個「第三者」嚟同佢哋影相。呢個人就係新郎哥最好嘅朋友，亦即係伴郎喇！古乳有暈，能成為密友大概總帶著愛。話晒同新郎咁多年朋友，相信佢哋嘅感（基）情一定好深厚⋯⋯

簡直深厚到想咀新郎一啖呀！當新郎同新娘喺度咀咀嘅時候，伴郎只能夠默默咁嘟長個咀仔喺側邊做個電燈膽咋⋯⋯最重要都係鞋底上面嘅心聲，當新娘講「我願意」嗰陣，伴郎心入面其實係講緊「我唔制呀～」！

嗚⋯⋯「新郎結婚了，伴郎仲要係我」，仲慘過自己個前度請飲呀！新娘仲要喺隻鞋度宣示主權話自己贏咗呀！人哋已經好傷心㗎啦，要望住你哋放閃，你仲咁講嘢，抵畀人叫你收聲嘅。

不過伴郎哥，你都唔好咁傷心啦，仔死仔還在吖嘛。呢輯相放咗上網之後，大家都話伴郎好可愛，仲有勁多仔仔女女問佢係咪仲單身，想識下佢咁話呀。

你哋全部都諗多咗喇，其實呢個只係影相效果嚟㗎咋，伴郎哥唔止唔係hehe，仲已經名草有主，有個靚女女朋友㗎喇！女朋友見大家咁踴躍，仲特登喺FB留言表明身份，叫大家諗都唔好諗住同佢爭仔?啵！

唔知換轉係一個毒L幫女神影啲咁嘅結婚相，又會唔會有咁多仔仔女女想識佢呢下？

封面圖片及資料來源：Country Roads Photography、Bree Orchard​