聽人講貪心係人奮鬥嘅原動力，不過貪得蠢咪變咗貪字得個貧囉。冇計啦，呢個世界總係會有啲好天真好傻嘅人，以為做咗啲衰嘢係冇人知㗎⋯⋯

早排Ellen Show嘅主持Ellen DeGeneres特登喺佢間禮品店度放咗個牌，寫住每個現場觀眾都可以免費拎一份禮物留為紀念，仲特登唔搵人睇住，等啲人自己揀，自己拎。

咁大膽？唔怕有人掃晒咩？Ellen話，大家講個信字㗎啫～但係最大嘅原因係佢其實偷偷地裝咗個針孔攝錄機睇下自己啲觀眾乖唔乖呀！好彩結果都冇令Ellen失望，大部分Fans都乖乖地拎咗一樣就走⋯⋯除咗有兩個人特別引起咗佢嘅注意。

第一個就係呢位小姐，佢諗咗好耐，要衫定要帽好呢？最後佢居然講咗句「頂帽我都係陣間自己買啦」。真係好乖好誠實呀～

Ellen 即刻變咗樵夫水池個女神咁，話為咗獎勵女觀眾咁誠實，就送埋頂帽畀你啦！呢位女觀眾就好啦～畀Ellen點名讚佢，仲有多份禮物?！

呢個金髮阿姐就冇咁好彩喇，佢都係畀Ellen點名，不過係點名恥笑呀！

原來佢係全場唯一一個拎咗幾樣嘢走嘅觀眾，仲叫埋個friend幫手拎?喎！拎一次都算啦⋯⋯

仲要搏人唔多覺，返轉頭拎多幾次呀！Ellen想唔出聲都唔得啦！咪睇金髮阿姐笑笑口咁，現場氣氛不知幾尷尬呀⋯⋯佢話喎，其實佢都係想拎畀嚟唔到現場嘅家姐啫～咁有孝心呀？咁其他紀念品一定係拎埋畀姨媽姑姐喇！

打自己手板都冇用㗎喇，衰咗就衰咗，你都係接受懲罰罷啦。

最後Ellen決定要罰佢坐監！唔係真係報警拉佢，係特別放咗張櫈仔喺個台度，要佢成個節目坐喺嗰個Ellen's Jail度啫～想懲罰一個人，唔使用劍嘅，喺電視畀咁多人點晒相，知佢衰貪心就夠晒瘀啦⋯⋯

當然都有啲人會懷疑會唔會呢個阿姐有冇咁蠢呀？咁都估唔到有cam？呢層就好難講喇，話唔定係節目效果呢～不過呢個世界都真係有好多咁「聰明」嘅人嘅⋯⋯

封面圖片及資料來源：Buzzfeed、TheEllenShow／YouTube