2017年06月22日 星期四
【試醬大會】估下呢三隻醬邊隻同薯條最夾？
「我係薯條控」版主食薯條仲多過毛毛食米，而曾經畀佢用薯條蹂躝過嘅醬汁同配料更加係多不勝數⋯⋯嗱，聽講唔少人都話天下間冇薯條駕馭唔到嘅醬汁㗎嘛，咁唔知以下呢三款由毛毛精心準備嘅汁汁又同薯條夾唔夾呢？有請薯條控為呢三款汁汁評分！
1）XO醬＋胡椒粉
呢隻混醬係由XO醬同胡椒粉混合而成，而XO醬同胡椒粉嘅比例呢⋯⋯係隨心嘅。
薯條控評分
評價：呢隻醬算係喺可接受嘅範圍之內，但XO醬味道太濃太搶，食咗一陣先試得出有胡椒味。如果大家食薯條嗰陣鍾意點辣醬嘅，應該會覺得OK嘅，55。
分數： 3.5／5 （合格有多，OK啦！）
毛毛評分：係香港嘅味道呀哈利！
2）醃漬雜菜醬
驟眼望落去呢兜醃漬雜菜醬有啲似泡菜，而聞落去就不禁令人諗起野原廣志隻襪喎⋯⋯到底用呢兜醃漬雜菜醬嚟點薯條食嘅效果會如何呢？
薯條控評分
評價：陣味聞落唔多開胃，真係未試過啲「咁極端」嘅醬⋯⋯ （佢對毛毛報以霞姨式笑容）
分數：未知 尚未示意／5（薯條控話連分都唔想畀喎）
毛毛評分：呢個醬同《綠袖子》一樣咁難頂⋯⋯
3）蘋果醬
一打開蓋就聞到蘋果蓉嗰陣酸酸甜甜嘅香味，好似幾開胃幾吸引咁啵！
薯條控評分
評價：出奇地好味，酸酸甜甜，十分吸引！
分數：4／5（喺薯條控眼中，4字頭算好L高分㗎喇！）
毛毛評分：正過點茄汁，強烈推介大家一試！
試後報告：
薯條控話，其實薯條嘅包容性真係好大，同好多唔同嘅醬汁同配汁都好夾，不過佢冇諗過毛毛一個醃漬雜菜醬就KO咗佢囉⋯⋯而問到薯條控食薯條嗰陣最鍾意點咩醬呢，佢就話覺得蛋黃醬先係薯條嘅Perfect Match，茄汁都係其次喎。
