成世人流流長，總會遇上幾個人渣。呢句說話唔止放喺情場啱用，職場都一樣咁啱㗎！同啲同事朝見口晚見面，佢哋有啲咩衰嘢，唔通你唔知咩。同班同事熟起上嚟，簡直對佢哋又愛又恨呀！

是咁的，愛爾蘭有個新聞節目搵咗個主持喺室外做天氣直播，直擊報導出面有幾橫風橫雨呀！

其實主持哥哥都好醒㗎喇，諗住拎把大遮，咁咪落雨不怕，落雪也不怕囉～你睇佢幾型仔咁報導天氣，點知就喺呢個時候⋯⋯

竟然突然刮起大風，吹到主持哥哥遮都反埋，仲要畀陣風吹埋出鏡呀！呢個毛文梗係要交返畀廠入面嘅同事頂住先啦！而作為好同事，喺呢個咁重要嘅時刻，佢哋忙緊另一件事。

忙緊恥笑嗰位被風吹走咗嘅同事呀！好心你哋班人就咪咁衰啦，人哋咁辛苦喺出面報天氣，你班友竟然喺鏡頭面前笑到肚孿，你叫主持情何以堪呢？仲要笑到講唔到嘢咁濟，又交返畀個主持喇。

好彩淨係把遮吹爛咗啫，主持哥哥都冇咩事。佢除咗一邊雞手鴨腳咁整返遮同笑埋一份之外，佢都唔知畀咩反應好呀。而廠入邊嘅同事⋯⋯

已經笑到瞓底埋喇⋯⋯你班友有人性到呢⋯⋯唉，算啦，主持哥哥，你都唔好太傷心喇，做同事嘅嘢，唔係你笑9佢，就佢笑9你㗎啦～咁喺正你面前笑你都好過喺背後跣你吖係咪？

封面圖片及資料來源：Ireland AM