「喵喵喵～」大家有時候返屋企都會聽到一兩聲貓叫，甚至會見到有流浪貓經過。唔知道大家有冇諗過或者試過接觸佢哋呢？其實流浪貓同大家屋企嘅主子一樣，好需要人關心，好需要大家嘅愛。香港有一對小情侶GiGi 同阿軒，因為唔想流浪貓寂寂無名咁過一生，所以除咗身體力行咁同流浪貓玩，仲開咗個叫「香港街貓圖鑑」嘅Page，記錄低每隻遇過嘅流浪貓，mark低佢哋嘅名、性格同專長，實行要逐隻介紹畀大家識咁話～ （話說毛毛同佢哋做訪問嗰陣，有一隻叫Whewhe嘅流浪貓一直坐喺隔離。嗚～ 真係好warm啊！）

「喂！點解我哋突然做咗朋友嘅？」

毛毛問佢哋，其實點樣先可以同流浪喵星人做朋友。GiGi話，其實係突然之間做咗朋友，仲要一直陪住情緒低落嘅GiGi。當年GiGi返學壓力超大，溫到面臨崩潰就會去公園坐，機緣巧合之下就識咗而家最愛嘅流浪貓－浪子。就係咁，浪子就日日陪著GiGi溫書睇書發吽哣，GiGi就陪住浪子訓覺，互相陪住，大家互相畀愛大家。而家佢哋仲熟到GiGi一叫浪子，佢就會傻咗咁跑出嚟，仲可以互碰鼻子。阿軒話嗰時自己都搞唔掂女朋友啲情緒，點知一隻流浪貓就平服咗佢嘅情緒，有時都真係會呷啲喵星人醋。（公然喺毛毛面前放閃，咁樣好咩？）

「原來你哋都識佢㗎？」

GiGi 同阿軒話開page除咗想記錄見過嘅街貓，仲想share畀大家知，街貓其實都可以好平易近人，人貓係可以共存。阿軒話開咗page之後，佢哋就更經常接觸街貓，仲會遇上好多街坊。其實有好多街貓嘅名都係街坊改，一個改完，個個都會跟住叫，有時啲名仲會好搞笑。GiGi 同阿軒就覺得街貓係維繫住社區嘅重要一環，佢哋自己因為街貓而認識街坊，街坊會因為貓而日日落街。佢哋仲話畀毛毛知，佢哋同街坊keep住有連絡，會一齊關注街貓嘅情況。其實喺做訪問嘅時候，周不時都會有街坊路過同街貓吹幾句水，即使得幾句，但至少畀咗個社區多返啲生氣先啦。

「其實只要處理得好，人貓絕對係可以共存㗎 ！」

一講起流浪貓，有好多人都會覺得佢哋好污糟，仲會引起好多社區衛生問題。其實要帶貓貓去絕育就一定㗎喇，連餵貓都要有秘訣，只要處理得好，街貓絕對唔係社區嘅負擔！雖然GiGi 同阿軒開得個page，都係想所有人好好愛護街貓，但佢哋明白冇咩可能，只係希望，就算有人唔鐘意都唔好傷害佢哋。

「其實我都好想畀你一個溫暖嘅屋企～」

毛毛眼見好多人一直為流浪貓默默付出，有錢就出錢，有力就出力，各自做好自己可以做嘅嘢。而GiGi 同阿軒就出時間，畀最大嘅愛畀流浪貓。毛毛相信每一個幫流浪貓嘅人，都好想畀個溫暖嘅屋企佢哋，當然包括GiGi 同阿軒啦～但家家有本難唸的經，其實邊有人忍心望住佢哋流浪呢。

毛毛後記

GiGi 同阿軒一知道毛毛想同佢哋一齊探街貓嘅時候，就好興奮，仲話係第一次帶人去探流浪貓咁話。毛毛一開始接觸街貓時都好驚驚，怕自己太出眾嚇親喵星人。但GiGi 同阿軒就不停傳授摸貓絕技畀毛毛，最後仲引到一種隻熱情貓同我哋一齊傾計（好warm啊！！！） Btw，GiGi 同阿軒超級照顧毛毛，用短短嘅幾個鐘，介紹咗十幾隻貓貓畀毛毛識～（毛毛同貓貓玩到就快唔記得自己係做緊訪問）仲有啊～ GiGi 同阿軒同毛毛透露之後會同手作人合作，將街貓個樣變成唔同產品，收益仲會用返嚟幫流浪貓㗎！