呢度係花，呢度係花，連呢度都係花！嘩！畫到成間屋都係花嘅，就係佢，花婆婆。今年87歲嘅花婆婆每日一起身，就會拎起支畫筆畫畫，呢度畫下，嗰度畫下，有時會畫下貓貓狗狗，但最鍾意畫、畫得最多嘅，都係一朵朵、五顏六色嘅花。

本身喺花墟賣花嘅花婆婆，退休之後，已經畫咗超過3000朵花喇。之所以咁勤力畫花，因為花婆婆想用佢餘下嘅時間，去多謝花。