一個製⽪匠，守護⽪廠的夕陽

2018年07月24日星期二

一個製⽪匠，守護⽪廠的夕陽

皮已收？

7、80年代，香港曾經有10幾間皮廠，但因為市場同成本嘅問題，皮廠搬嘅搬、執嘅執。如今，香港只係得返兩間皮廠，而其中一間就係位於葵涌、扎根香港超過30幾年嘅瑞興皮廠。

瑞興第3代傳人、90後嘅白浩謙（Kean），深深體會到行業嘅變化。「細個嗰時，工廠會包午餐，食飯有兩三圍檯，3、40個工人。到後尾得返一圍，呢幾年成個行業更加係跌得好快。好多行家用仿皮、PU皮去代替真皮，成個世界用皮量都低咗。例如以前日本落單買皮造鞋，郁啲一萬幾千隻，而家可能係50、80隻咁去做。當2呎皮做一隻，幾十隻用得幾多皮？而家全行都萎縮緊。因為鍾意皮嘅人係有，但用皮嘅人唔多。」

至於香港，製皮業更加已經係夕陽行業。「用大批量形式生產皮袋嘅廠，而家香港係零。又係市場、租金嗰啲問題，因為做嚟都係幫業主打工。至於皮廠，廠客愈嚟愈少，我哋唯有開始轉做細批量訂單；至於另一間皮廠，係由個年紀頗大嘅伯伯同佢個仔去經營，但佢哋而家都盡量減少生產，主要賣原材料。」不過面對行業式微，Kean竟然決定繼承3代祖業，做一次「守業者」。

地方的皮革需要愛

究竟係咩驅使呢位年青人咁做呢？係愛呀？定係責任？毛毛真係唔明。點知Kean諗都唔使諗咁答：「係愛同責任﹗父母過去一直付出，我都會諗佢哋退休嘅問題；我而家付出，都係因為愛佢哋所以承擔呢個責任。」

當然更重要原因，係因為佢窮……盡一生都想守護皮廠呀！「由細到大喺皮廠，點都會對呢個行業感情重啲。望住行業式微我會諗，唔做，就會冇㗎喇。我唔想浪費屋企做咗咁耐落嚟嘅嘢。咁點解唔嘗試下去做返好呢樣嘢，換個方式去行落去呢？」

因為咁諗，Kean決定創立品牌The Lederer，唔止搞皮革工作坊，仲賣堆DIY材料手作包。製皮賣皮一條龍！「原先諗法係，原材料嘅成品價值就係得咁多；但將佢變做半製成品，做品牌，可以令更多人接觸到我哋嘅皮料，從而帶返生意去皮廠度。而且唔用『瑞興』呢個名，係因為我目標唔止香港、台灣市場，而係想有日將皮料推廣到歐洲、美國！」

跟皮力盡

你話你都鍾意同皮革玩遊戲，製皮其實唔難？喂，先唔講環境污糟，淨係嗰陣好大陣嘅死皮味傳入你的鼻，都唔係咁易頂得順㗎。「製皮係厭惡性嘅，因為原材料係一張張有毛有血嘅牛皮，收返嚟全部都係屠宰場劏完直接拎過嚟，所以要先放入大轉鼓洗乾淨、脫毛，整走皮下面啲脂肪同肉，先可以分層處理。跟住仲要染色，伸展，晾乾；先可以開裁，加工……」

不要再說了……原來毛髮可修飾的一對手，係要做咁多嘢㗎？「仲要留意天氣、水質，同點處理塊皮。好似香港天氣潮濕，買皮褸放衣櫃太耐都發霉啦，我哋做皮更加要控制好，如果唔係塊皮未乾得透就包裝出貨，可能成批貨都發霉！所以落幾多水、化學嘢、鞣劑，全部要好精准，多或者少0.1%，塊皮都唔同晒！至於啲（死牛皮）味？慣晒啦，對我嚟講唔係問題！」

創業難，守業咁難！

乜嘢都太隨便，梗係冇人畀面；但即使Kean一啲都唔隨便咁用心做皮，原來，都唔係個個肯欣賞同畀面。「因為我哋係香港本地製作，唔係外國大廠大品牌生產。好多人先入為主覺得外國嘢實好啲，或者買皮梗係買意大利皮，所以唔理張皮點做出嚟、啱唔啱佢用，都會產地先行，揀我哋代理緊嘅意大利皮而唔揀我哋造嘅皮。」

當然呢少少「苦楚」，對於Kean嚟講都係等於激勵。「我哋原則一定係繼續堅持用香港屠宰場嘅牛皮，一來牛你始終要劏要食，用返啲皮相對環保啲；二來做咁耐都係用呢隻牛種，皮料效果、特性，都係最熟悉。希望大家有日可以認知到，本地皮都可以做到好靚！目標係做到有日你就算知道產量少，都會話：『知你一個月做得咁多，唔緊要，我等！』」

「每日都有唔同問題要解決，但我會嘗試用自己方式去行出嚟，喺呢個地方守護返香港嘅工業。」前路漫漫要如何走過？冇人知。但Kean堅定嘅眼神話緊畀大家知，佢，一定會繼續努力試。