28年、15個主題、161場棟篤笑。子華用觸覺、用幽默、用金句築起香港棟篤笑黃金時代。
呢個黃金時代，陪伴香港人嘅有阿堅阿強阿祥阿爺仲有阿Mary，仲有無數「除褲」「回水」同埋笑聲。
當然歡笑背後往往都係有血有淚……

每個撳爛嘅F5掣上面，都係血；每次驚搶唔到飛冇得入場，都係淚。而即使入到場，又係一場血淚－－畀人講中晒心聲，句句都拮到入肉，笑中有淚呀！

2018年7月31日，子華正式「金盆?口」，身為子華迷嘅你或者都忍唔住再一次落淚。但當你回首望，望返子華棟篤笑入面嘅每個片段，你醒悟，能夠同子華度過咁多歡樂一笑嘅時刻，真係幻海奇情。

一切美好回憶，彷如昨日。即使係充滿血與淚嘅歷史，都會繼續留存喺每個子華迷嘅心中。

子華，多謝你。

長輩級子華迷－胡楓（修哥）

子華話過，唔係因為修哥，佢未必會去紅館；而其實唔係因為子華，修哥都未必會鼓勵人去紅館：「我好欣賞子華。同佢拍劇，佢會不斷將劇本刪改得更好、將對白講得更好；度橋更加係不遺餘力，甚至通宵達旦。所以喺我心目中，佢係個非常勤力嘅人，而且佢係一個天才嚟。天才加上勤力，佢成功就係喺呢度。」

所以子華跟住去邊度？修哥冇擔心過。「佢唔做棟篤笑當然有啲可惜。我想同佢講，叫佢唔好封咪，繼續做畀多啲觀眾歡笑；當然假如真係唔做，咪繼續自己嘅工作旅程，鍾意點做就點做。我相信佢做咩都會成功嘅！」

好兄弟級子華迷－古巨基

子華「金盆?口」，唔少子華迷都喊出嚟，基仔自然唔例外。「尾場佢最後講完要走，我心情好難形容，眼濕濕喊晒。由多年前佢周街貼街招一路努力累積，到今日階段性完結，好唔捨得。希望佢反口啦！呢個世界冇乜邊個反口完，大家會好開心咁接受。得子華能夠做到。」

喊完，基仔忍唔住分享返做子華迷嘅快樂。「子華有咩演出我都支持。佢唔止帶畀大家歡樂，仲畀大家好多思考空間。另外你見子華轉數快又有幽默感，佢仲係個睇好多書、努力吸收唔同知識嘅人，所以佢學問先咁淵博。大家覺得佢咁『神』，其實佢背後花咗好多努力！」但毛毛點努力都冇辦法聽到佢講棟篤笑了！「佢喺聚會裡面都好㜺鬼，所以我哋平時都欣賞緊佢嘅棟篤笑，抵到爛！」嗚嗚，這些機會不是屬於我的…

拍檔級子華迷－佘詩曼

迷子華的人有福了，因為子華金句是他們的！咁身為子華好拍檔嘅阿佘，一定更有福啦？「子華嘅棟篤笑唔止對我有意義，對全香港都好有意義！因為佢係代表香港人發聲，好多我哋唔敢講嘅說話佢都敢講；或者日常生活中唔識表達嘅說話，佢都可以幫我哋講出嚟。好似幫我哋吐咗一口氣咁。

好，咁而家畀你一口氣講晒點解咁迷子華啦。「子華好有學問、博學多才、聰明、有風度，好易相處同一啲都唔孤寒，每次叫佢『萬歲』都應承！而且佢嘅棟篤笑唔止為我哋帶嚟歡樂，仲令我哋更了解自己，更關心社會，同用更樂觀嘅態度去生活。所以我相信佢咁多年嚟嘅金句，我諗唔止我，係全香港人都會記住。一生受用。多謝你呀黃子華！」多謝阿佘你幫手多謝子華呀！

同行級子華迷－卓韻芝

即使唔係子華迷，聽過子華嘅棟篤笑，都好容易有少少鍾意咗佢。但阿芝竟然話：「我唔鍾意子華。」下？「我係敬佩佢尊敬佢！《金盆?口》主軸係香港近代史，但子華本身就係香港史嘅一部分，子華就是子華本身的傳奇！佢唔止將棟篤笑喺香港普及化，仲改良埋表演形式。例如好多國家都有棟篤笑，但從來冇獨腳棟篤笑長達三小時。『喂，做死人咩？』但子華就係做到，而且絕無冷場，所以基本上黃子華係癲嘅。先鋒呀，瘋狂個瘋呀。」

不過講瘋，睇子華棟篤笑睇到入迷嘅阿芝可能仲瘋。「自己係同行中嘅一名小後輩，好自然會用返身為表演者嘅角度去睇。例如計住對方用幾多句去Build-up爆笑位、用幾多個字轉話題、第一個笑話、最後一句又係乜。所以子華令我最深刻嘅，未必係好多人心目中嘅金句，反而係今次Show嘅最後一句『能夠同各位觀眾歡樂一宵，都算係幻海奇情。』嘩，痴線！好詩意，我感動到毛管戙！」

感動之餘，阿芝都想學子華「癲」埋一份。「當時我係喺寫稿途中收到子華封咪嘅消息，好直接嘅反應就係即刻請香港一群獨立棟篤笑表演者，做嚟緊十月我棟篤笑Show嘅暖場嘉賓。因為香港好多棟篤笑表演者，其實好需要機會喺大場表演去儲經驗。我好希望嘗試盡綿力去推動香港嘅棟篤笑表演文化，盡做啦！」係愛啊，阿芝！