由即日起，每個月1號至31號嚟天星碼頭文化大媽區，每日超過150個自由行為藝術演出單位請你聽音樂放題！首輪超強音樂陣容包括：強國開心舞天團「熟女時代」、當紅迷幻搖滾天師Lady Dama、噪音班霸Red Hot Chili Mothers，仲有喺旺角載譽歸來嘅重金屬口味樂隊DLGH！

今次天星音樂節仲搵嚟亞洲音樂鬼才陳奐仁領銜，做你嘅音樂嚮導，帶你欣賞亞洲最大規模嘅小喇叭陣演出，一齊求開心High爆尖沙咀！咁盛大嘅音樂盛會，你又點可以錯過？

日期：2018年8月起，每日
時間：每晚6點後
地點：尖沙咀天星碼頭文化大媽區

更多演出時間表同完整音樂陣容名單，親臨尖沙咀，就有得睇啦！

大媽，搵多兩龍大媽

首屆香港天星音樂節正式開鑼，最受大眾關注嘅，自然係為數眾多嘅大媽表演單位。不過獲邀擔任天星音樂大使嘅亞洲音樂鬼才陳奐仁提醒大家：「Busker（街頭藝人）唔等於大媽，但大媽可以做Busker。」之不過毛毛認為，雖然世上唔一定只有大媽好，但大媽都唔一定好㗎喎？

「你覺得大媽唔可以做Busker？街頭表演有好多種，乜都可以表演。其實煮飯都可以係表演，咁煮飯有邊個煮得好過大媽呢？」但而家係音樂節……「咁講到唱歌，有好多我欣賞嘅歌手，都被定義為『大媽』呢個類別嘅。（例如？）咁就唔好講喇。大媽嘅意思就係年紀大嘅媽媽，年紀大嘅媽媽好歌手，大家都諗到好幾個啦。邊個話大媽唔唱得歌？」

好唔好以及人之好

至於音樂節開始之後，大會收到唔少針對表演者嘅批評聲音，陳奐仁表示：「點樣算係好嘅表演者先？兩個角度嚟睇，技術好藝術性高就係好。不過音樂呢家嘢，好同唔好都係主觀㗎嘛。」咁依你主觀咁睇，天星音樂節表演者嘅質素點先？「技術上係分到高低，例如音準好定唔好；但音準唔好係咪代表唔好聽呢？有啲歌手音準唔好，不過好多人覺得好聽，咁就證明好唔好真係主觀嘅。」

「應該咁諗，如果話演出嘅人啲音樂唔好嘅話，點解有人圍住聽呢？即係如果有人話陳奐仁嘅音樂好好，咁點解又冇乜人聽呢？」講呢啲！「而其實就算有啲人覺得你唔好，你都可以覺得自己好。總之有人覺得好就得㗎啦。」媽，好玄呀……

人品好，牌品自然好

每日成堆自由行為藝術表演者同步演出，實在太多喇！所以唔少音樂節參加者都提出不如由官方發牌限制表演者數量。「車牌咁？會唔會好似的士牌咁愈炒愈貴呢？另外如果有牌先可以做，我第一個問題就係『個牌難唔難考？』。因為做監制、編曲唔使牌；寫歌作曲作詞甚至做歌手都唔使牌；但街頭表演要攞牌，好似難過做音樂喎。而且冇牌嘅人點評審嗰啲想攞牌嘅人呢？冇牌嘅人去批牌，準則又係咩？呢啲要深思。」

「其實表演最緊要嘅係人品，睇你會唔會同人爭先恐後、傷害『鄰居』；第二個原則都係人品，即係會唔會整污糟地方、有冇公德心；第三都係睇人品，以前冇喇叭嘈嘅範圍有限，20米外其實冇人理你；但而家喇叭影響範圍闊好多，去到1、200米都得，要注意唔好嘈到人！」重要嘅事講三次，希望每個表演者都收到啦！

成功需Full幹

身為音樂大使，陳奐仁呼籲參加天星音樂節嘅人，有心嘅話不如試下做表演者！「歌手都需要主辦方認同先會帶佢上舞台； 但喺街頭表演唔需要人認同身分，都可以企出嚟唱自己想唱嘅嘢。所以只要你想唱，咪唱囉！」

而如果你想成為頂級嘅表演者，其實都唔難。只要肯出盡全力Full幹就一定得！「人人有希望！我做音樂，尤其喺早期係做到唔瞓覺、唔記得食嘢，平均每日做十個鐘以上；做運動都係一樣，日日都做，做到差啲嘔。只要盡力，你都得。無論係音樂、健身或者任何嘢，只要肯投資，即使你好似陳奐仁一樣正常人一件，都係鐵柱磨成針。你問有冇第二啲方法？我嘅答案係，冇。」好，咁毛毛再努力啲，遲下音樂節舞台上見啦！