你點知聽日會好天㗎？希望在明天呀嘛……就奇！

生命嘅奇妙之處，在於有時你捱過咗逆境之後，往往會見到順境－－係順住落嘅一連串更大逆境呀！只係想快樂過生活，點知現實就要拚命去生存，你忍唔住被迫發出最後嘅吼聲：「點頂呀？」

唔使驚，大叔喺大廳。佢哋年紀大，所以知道人生中乜嘢先係最重大；佢哋見識過風大雨大，所以知道所謂嘅「巨浪」其實都係咁高咁大；佢哋肚腩……不要再說了。聽聽潘燦良同黃德斌兩位大叔分享下佢哋嘅人生經驗，就算你他日上游唔到做一流大叔（或者大嬸），至少都可以喺逆流中生存，做個逆住風都快樂嘅大叔嘛係咪？

畀次機會……老細！

生命冇希望，因為要返工。放工先嚟OT，唔通連老細都唔鍾意我？黃德斌話，未必嘅。「喺呢個世界，工作必然係辛苦嘅。如果有冇壓力嘅工作，唔該你介紹畀我！唯有揀份自己喜歡嘅工作，咁乜嘢壓力同辛苦，先冇咁在意。好似做演員，對人多對事多、而且不斷演緊人哋而唔係自己、甚至要做好壓抑嘅角色，工作唔簡單亦唔容易搵到錢，咁你必然係因為喜歡先會去做。」

衰在老細專點毛毛做完全唔想做嘅Job呢，點頂硬上呀！「唔好話頂硬上，係呢刻都要接受。邊個唔想做經理、做老細呢？但你唔係一出世就做到老細，咁點呀？只有循序漸進。幾唔鍾意都去做，一個個步驟咁做，總有日到你做老細。」真的嗎？典解嘅？「因為做好你自己，就會睇到成果。（捱完都）做唔到？咁你要問下自己點解喇……」

態度決定溫度

身處逆境，人好易各種空虛冷冷冷。但阿燦話只要識得諗，這個階段不太冷。「遇到困難，放棄更容易，任何一秒都可以；堅持落去反而好難，但你做得到，突破之後自己都會滿足。任何事都係，有時換個方法做，可能已經解決到困局，點解要放棄？放棄完係舒服啲，但真係滿足到你、令你開心啲？真係能夠令你以後日子過得更好？呢個要你自己衡量喇。」

「心態嘅話，我好欣賞日本『職人』，用人生所有精力去將一件事做到最好。例如做碗，唔係淨係整得靚等有人買，而係諗碗背後嘅意義，想令捧住碗食飯嘅人感到溫暖滿足。係使命感嚟㗎！每個人都應該有使命感。香港環境係幾苛刻、節奏快、比較功利。但如果喺有限條件裡面做好自己，成個社會就會更好。更偉大嘅希望係，你會影響人哋都咁做！」好，咁毛毛都努力喺心中留住溫度速度溫柔和憤怒啦！

你有工作壓力，未解決！

至於返工嘅逆境－－即係這晚那晚都壓到爆炸嘅工作壓力，你有我有，阿燦都有。「梗係有！尤其演員係希望偷懶嘅動物，但導演就係永遠都唔會飽嘅動物，佢總係希望你再做多啲，將所有嘢攞晒出嚟。有時我會諗：『咁都仲未滿意？好攰喇喎！』」唔會滿足嘅老細，毛毛明，真係明。點解決……佢？「唯有吸啖氣，相信做完之後會得到更多。『你唔滿意呀嘛？我就做到你滿意為止。』甚至對住畀壓力你嘅人，畀個笑容佢：『多謝你畀呢個機會去磨練我。』你可以話好阿Q，但呢個係積極嘅方法；而能夠令佢冇聲出，呢個就係你嘅能力！」

咁當然壓力太大，又唔需要下下都逆境自強嘅……「香港生活節奏快，所以好多人不如意時就會搵嘢去填補，例如上網、打機、或者㩒手機，但愈塞呢啲嘢入去可能愈空虛；反而我覺得靜落嚟，畀空間自己去面對現實同眼前一切，掉開愈多嘢先至再袋得返更多有價值嘅嘢。當然每個人有唔同嘅方法啦！但如果有問題你唔去面對嘅話，你逃避只會愈走愈遠。」
 

機會，係留畀有裝備嘅人

逆境又有咩好怕喎？希望在明天呀嘛！不管你信不信，反正黃德斌信了。「尤其喺香港咁多壓逼、咁複雜嘅環境，你更加要識去自處。首先你唔好放棄自己。人哋點睇你都唔重要，最重要你點睇自己。如果自己都睇唔起自己，邊會有人睇起你？心態上一定要調節好先。」

之不過生命雖然滿希望，想要前路，都要由你創。「有陣時係要等機會嘅，當然你要時刻裝備好自己。例如我知道自己要應付好多體能上嘅工作，平時就會做多啲運動；演戲上，就留意自己有咩可以改變嘅，搵機會去突破。做好自己，我相信有人會見到，咁機會嚟時你就可以把握到；你唔努力淨係喺度hea，要人尊重你都幾難啦！」大叔，明白了。