因為如果女人心係海底針，咁男人心一定似海參－－就嚟畀人撈晒上嚟啦！經過多年研究，男人呢種動物嘅行為生態已經通街都知：容易心軟、耳仔仲軟，但有時又硬係好要面，見到靚女又肯定硬晒……條頸咁喪望！之但係，如果以為咁就可以完全掌控男性，少女（或者少男）們你真係太年輕了。

嗱，睇埋畢生致力進行男性研究嘅娘娘•杜小喬（To Siu Kiu）新推出嘅著作《男性的弱點》，3分鐘睇穿一個男人，100%洞悉男性心理不是夢！想收兵？得，揸住佢哋嘅弱點慢慢收啦！

男人心Easy嘛？

「男人心，都唔一定唔係海底針㗎。」頂尖男性心理學家娘娘‧杜小喬表示：「即係可能女仔都唔係好明男仔點解會諗：『只要你做啲嘢、冇做啲嘢，就等於某啲嘢。』未必係1＋1＝2呢個概念囉！好似我有個朋友想約女仔睇戲，個女仔話唔睇，佢就覺得『唔應承出嚟等於唔鍾意我』。但佢冇諗嘅係個女仔或者未必想睇嗰啲戲呢？可以好多原因㗎嘛！」

經過深入觀察同分析，杜小喬得出一個結論。「目標導向！一件事可能有好多個層次。做咗啲嘢，咁背後個動機呢？唔做乜嘢，背後個原因又係咩？男仔好多時會在意達唔達成到目標，但中間好多細節位唔夠敏銳。」而呢個弱點（或者係盲點），或者都會有另類作用：「例如當女仔意識到佢嬲緊，咁佢肯去做一個『氹』既動作，可能男仔會容易啲原諒啩？」

心軟不受硬

咁男人面對女人好易會變成一款甜品－－心太軟，呢個傳聞唔通係真嘅？杜小喬有咁嘅睇法。「男仔係咪容易耳仔軟啲？未必，睇每個人性格！易唔易氹係講你有幾了解對方。首先氹嘅時候，要睇對方係咩心情；而如果本身了解佢鍾意乜唔鍾意乜，一定易氹啲。最緊要誠心！即係如果有人氹緊我，佢知我想要咩，就算方法唔啱都好，我見到佢呢份用心都會原諒佢。男仔亦然嘅啫。」

至於受軟但心硬嘅男人，想輕鬆氹掂就要用啱方法。「真誠嘅道歉都係好有用㗎。但道歉唔係等於『對唔住』呢三個字。係等於你背後做咗幾多嘢去支持你嘅對唔住。例如做唔同嘅行為要求佢原諒啦。不斷打電話畀佢、去佢屋企樓下搵佢、整嘢食畀佢、整一啲佢想要嘅嘢，又可能會寫信畀佢，或者佢鍾意啲乜你就去買啲佢鍾意嘅嘢比佢……你要不斷了解不斷了解，直至捉到佢真正想要嘅嘢！」呢個秘訣，毛毛捉到了。

女人不嗲，男人不愛

To嗲or not to嗲，唔係一個Question；但識嗲，先至有Function。「如果我同一個男仔出街，而對方係我男朋友，畀我知道佢?女仔嘅話，即使我本身都?緊都會鬧佢！我可能會話『你係咪想死呀！』或者扭佢耳仔，等佢知道『即使你覺得我唔係望緊你，其實我都係留意緊你㗎喎』。男仔係知我嗲緊佢嘅，唔會真係覺得我鬧佢㗎嘛！」

唔想嗲，都可以讚。「我係好鍾意讚人嗰種人嚟㗎。不斷講人唔好嘅嘢，對方可能唔會因為咁改變；但你讚人，可能佢本身冇乜信心，就係因為你讚多佢一兩句而做得更好呢？我會不斷講正面嘅說話，無論男女，只要做得到我都會讚，絕對唔會想人因一番負面說話而信心低沉！我覺得呢個係相處之道入面嘅好方法。」

N分鐘看穿一個男人

不過杜小喬分析過，要徹底了解一個人，係冇捷徑嘅。「要相處！我如果鍾意一個男仔，我會逼佢同我相處，等佢知道我係個點嘅人。當然我會誇張一啲平時嘅行為，例如我覺得個男仔接受到嗲，就會好嗲好嗲；如果個男仔接受到我天馬行空嘅想法，我就會將我天馬行空想法嗰方面放大。如果佢接受到最多嘅嗰個我嘅時候，畀訊號我：『咦？同你相處都OK喎。』咁其他程度都無問題啦！」

至於要花幾多分鐘相處至得？去試下啦，仲問！「其實不論男女，你同佢相處得夠耐，你肯花時間聽佢講嘢，你一定會知道佢做緊乜，甚至預測到佢想做乜。只要大家相處多啲，無論男女，都一定會有化學作用！」洞悉人心（不論對方係0歲定99歲）嘅訣竅，原來就係咁簡單……