就係因為冇呢個理財觀念，當年無數細路仔，一拎到阿爸阿媽畀嗰十蚊現金，唔使六個月，已經忍唔住使晒啲錢，然後日日甚至隔日慘到要喺度數手指－－數下仲有幾多日先再有零用錢拎呀！結果十歲儲唔到十萬，廿歲都未儲到，然後三十歲……錯過咗儲蓄嘅黃金階段，咁就一世㗎喇。

好似今年過完十歲生日嘅劉皓嵐（劉小華），呢刻仲未收到佢阿爸「大劉」送嘅十萬蚊生日禮物，賺到人生第一碗金嘅機會已經好似揸住副爛牌想食糊咁，機會係零呀！不過，如果把握最後時機，可能、或者、大概仲有希望儲到十萬都未定呢？

十萬蚊為甚麼

十歲嘅劉小華（劉皓嵐），對於有人喺十歲生日收到十萬蚊，腦入面有唔止十萬個為甚麼。「十萬蚊有幾厚呢？有冇咁厚呀（雙手比劃出十厘米厚度）？十萬蚊可以點用呀？真係諗唔到，太多錢。從未諗過會有十萬蚊咁多。如果阿爸送十萬畀我？咁我會畀返五萬蚊佢，因為自己會亂咁使咗喺唔知邊度；之但係做乜要畀十萬我呢？我都唔會用得晒咁多㗎啦！」

至於今年生日收唔到十萬蚊做禮物，小華表示一啲問題都冇。「我最想要嘅生日禮物就係有人陪我玩下！所以阿爸阿媽每次都會同我開生日會，搵個場地或者租Party Room，畀我同班朋友玩，呢樣已經係最開心嘅生日慶祝。唔使畀十萬我，畀一日我開心玩盡佢已經得㗎喇！」

而家儲，但係你將來會有？

而雖然十歲仲未儲到十萬蚊（and冇人畀十萬佢儲），不過小華覺得，幾十歲嗰時一定會儲到。「而家每個禮拜我有2、30蚊零用錢，可以每個星期咁儲。返學啲錢最多用喺小食部度之嘛，又唔會周圍行街買嘢。兩個字：『慳錢』，唔好用咁多就儲到！慳錢就係我嘅理財哲學。」

之但係唔少人打咗好多年工，都慳唔到十萬呀……「希望我儲到啦。不過其實儲到十萬，可能都係會用嚟去旅行。想去日本，或者美國都好。」吓？唔去少啲日本買唔到樓㗎喎？「啲樓咁貴點買啫？我寧願同屋企人去幾次旅行，仲幸福啲。或者買啲自己想要嘅嘢，例如買下新Game；因為我鍾意煮嘢食，仲想買啲爐同平底鑊。慳住慳住咁用，呢啲嘢買晒可能一二萬蚊到啫！十萬蚊實用唔晒。」

先數未來錢

錢唔係問題，但問題係未有錢嘛！小華你冇人哋咁多錢梗係唔知有幾爽啦……「咁我確實唔明有錢人嘅思想係點。但我冇，我又唔會羨慕。我有個幸福嘅家庭已經夠開心㗎喇。而且我爸爸媽媽其實都好努力咁賺緊錢！雖然住喺一間好細嘅屋，但我有遊戲機，有自己鍾意嘅Game，有個位畀我練下舞，已經足夠。」

如果你而家夠多銀紙，得閒拎啲出嚟數下，可能仲開心呢？「數銀紙唔係我興趣，數嚟做乜呢？有人或者鍾意數銀紙，享受數銀紙嘅時候；但我唔會浪費時間數銀紙，我返去打機算啦。（銀紙）唔係我嘅玩具嘛，我有自己鍾意嘅玩具咪得。」小華補充，再鍾意數，都唔使周圍同人講：「你數都唔關我事㗎。你又唔係數完之後畀一萬我，咁你講嚟做乜呢？」

成功需父幹

喺呢個時候，企喺小華隔籬、身型都幾大隻同大份嘅小華爸爸（簡稱「大劉」）終於忍唔住要爆喇。「畀十萬佢？冇意思㗎喎。純粹掉嚿錢畀佢鍾意點就點，佢唔識理財洗晒又冇意思；你話畀佢儲，咁擺我戶口同佢戶口冇分別㗎。除非你話有任務，例如睇佢三個月內點用十萬蚊去做有意義嘅嘢，咁如果我有錢就會考慮咁做；又或者畀實際啲嘅嘢佢，好似佢鍾意跳舞，就買跳舞衫跳舞鞋畀佢。」

如果有錢……講到尾即係你而家冇十萬可以畀佢啦！「我畀到『陪同』仲有愛！好過畀物質嘅嘢佢，親子時間寶貴過任何嘢。更重要嘅係做個好嘅榜樣畀個仔睇，你想佢第時大個係點，首先要自己努力做到先。因為講真香港地要搵錢實有辦法。反而想教識小華，唔好純粹為搵錢而搵錢，搵完去玩去揮霍；而係搵到錢，去做有意義嘅事回饋社會、幫助他人。」係愛啊，大劉！