喺香港生存好難忍住唔問呢個問題。望下四圍，你唔知某啲人喺度做乜（例如你隔籬位同事用方法演技偷懶都冇人發現），甚至唔知成個社會究竟做乜。不過最弊係，有時你自己都唔知自己做乜。臨時演員都係演員，講到尾都只係份工，但人生如戲，就算你唔係演員都要演完佢呀！

打工仔、人哋仔／女、男友／女友、鏟屎官……咁多角色，點先可以演得好？即刻報讀人生藝員訓練班，聽下茄哩啡領班霞姨教你生活中各式演技，咁或者從此你會知自己應該做乜呢？話唔定，廢青都可以從內到外成為生活喜劇之王都冇問題㖭！

堅持呀，霞姨！

人生如戲，真㗎！霞姨（B.Lee）話要演好生活中嘅每個角色，一啲都唔易。「做人最基本，就係做好自己每一日嘅身分同角色。做男朋友，你要做好男朋友嘅責任；做咗人阿媽，就要盡阿媽嘅責任。每個人都有唔同嘅劇本喺手，而且每個歲數都有你嘅角色，例如後生要做學生，補習返學考試，做好晒佢亦一啲都唔易！」

易唔易都好，要演得好原來首先要肯堅持。「《喜劇之王》第一句對白就係『努力、奮鬥』，霞姨個角色同我都係呢種人。好記得戲中鬧周生（周星馳），因為個「仆」音入咪收得唔好，於是我要係咁錄，噏咗好多次。原來淨係兩個字，你用唔同讀法、聲線、尾音、快慢去讀，效果可以差好遠！而其實你哋每一個都係霞姨嚟㗎，追緊一個女仔時，你哋都好堅持㗎嘛！所以做任何事都唔好放棄，要堅持。生命係應該有呢種態度同抱負。」

打工仔的自我修養

至於要演好打工仔呢個角色，霞姨贈大家兩個字：專業。「專唔專業冇一個標準，但其實係睇你有幾多誠意。首先行業基本知識你一定要有，然後就睇你儲返嚟嘅經驗，再嚟就睇你嘅投入、態度，人哋肯定睇到嘅！其實你搵到份鍾意嘅工，享受住咁去做，做落去自然會專業。」

但毛毛身邊好多辦公室戲劇大師，冇料扮專業，點頂呀？「呢類人見得多，有啲人係會偷懶甚至刻意搞破壞，咁你咪首先做返好自己先。唔好怕做多咗，你今日覺得做多咗係損失緊、佢著數緊，但你點知會唔會有日你坐喺淺水灣飲嘢嘅時候，佢仲揸緊車做司機呢？當然，如果你好似霞姨咁係負責搵臨記嘅，你見佢唔好好做，唯有捨棄佢！今日佢講『係呀我打份工係嚟Hea嘅』，你都冇可能請佢㗎？」

從內到外成為生活喜劇之王

霞姨～！想演得好之餘又想演得開心啲，有冇法子先？「工作就講專業啫，但人生嘅話『精神』最緊要。『精神』係指，你知唔知自己每日做緊乜？為乜而做？為乜要咁辛苦？一個人冇咗精神，即係有軀殼冇靈魂呀。你一定要知自己目標係咩先，然後學識去享受個過程。」

「人好多時為咗結果，會認為自己鍾意某一樣嘢。但例如你為咗掌聲，想去做主角，如果結果做唔成主角，你實會放棄。享受過程就唔同，因為係咪主角已經唔重要喇嘛，參與其中但求演出就開心。有啲人覺得『我好廢呀，做乜都唔成事』，唔好用結果去衡量咩叫成功！做鍾意做嘅事，就算攞唔到100分，享受到已經係成功！」

餓底茄喱啡生存哲學

係啫，但毛毛呢啲廢青，除咗茄喱啡之外都唔知自己可以做乜……「唔好畀廢青呢兩個字框死，廢唔廢其實睇你自己。每一個主角背後，都係由『精神啲』（臨時演員）開始㗎喎！何況就算最尾真係冇成就，你過程都唔會浪費㗎，最低限度你呢一分鐘都係學緊嘢。演員好多，咁影帝係得一個咋嘛！唔通咁樣代表其他人冇演技咩？」

「人生有際遇係事實，係咪最終可以做主角唔係自己控制。但唔通我做CEO就勤力，做文員份糧少啲所以就Hea啲咩？唔得㗎嘛。最緊要唔好畀自己停，有試過爭取過，向前行一定行到。人生要鬥都最尾都唔可以放棄㗎。生活係艱難，但總有出頭天。唔好睇輕自己！」對唔住，毛毛會記住我係餓底，要Stay Hungry, Stay Foolish㗎喇……