當然，可能你收到朋友轉發嘅絕密風暴時間表（毛毛冇朋友所以收唔到），話山竹後日8點改掛8號風球、大後日10點改掛10號風球。但你有冇諗過，佢同啲船公司最新颱風指引一樣，係假嘅啲料！

每次打風，風繼續吹，流言都會繼續吹，睇到暴風女神級主播陳嘉倩反晒白眼。而見今次山竹咁猛，佢忍唔住提大家，與其睇啲流言留言，不如花心思認真防風好過啦……

瘋繼續吹

大風吹，流言都會跟住吹。呢個天氣現象，暴風女神級主播陳嘉倩都見識過。「成日瘋傳嗰啲船公司颱風指引，我以前都中過伏。成班朋友話識人喺嗰度做，呢個話堅嗰個又話堅，就信咗。而家見到自動無視㗎喇，一來天文台澄清過冇發放呢啲消息畀船公司，而且根據過往經驗，冇次真嘅！」

但真亦假時假亦真，真真假假點去分？「可能要等智者出現先可以止到謠言，但暫時搵唔到智者嘛。尤其網絡咁方便，冇可能杜絕到謠言散播。只可以自己保持清醒，唔好不負責任咁散播消息。特別打風時資訊混亂，如果Make fun of風暴消息，要諗下真係會影響到人！」陳嘉倩補充，上年天鴿襲澳門，就有人散布假嘅傷亡消息畀人拉咗……

Source定老母

最弊嘅係，唔講係咪止於智者，謠言分分鐘嚟自至親者！「好似有朋友都講今次個風17級，而港珠澳大橋抵禦到16級風，好唔穩陣。咁呢啲數字係可以參考，但唔代表真係一掂條界就冧㗎嘛。唔講打風，阿媽平時都好鍾意Send咩『十點鐘就要瞓咪就會有咩嘢病』『每日食啲乜唔好食啲乜』，我直接唔理㗎！已讀不回。」

To信or not to信，最緊要識問Question。陳嘉倩自己都問過：「我打風前會喺窗用膠紙貼個『米』字，但其實自己都唔肯定係咪有用，因為聽人講過黐完反而更易爛，兩邊都有說法。唯有自己上網搵有冇權威驗證，結果發現原來黐咗膠紙會減少玻璃嘅共鳴效應，塊玻璃就真係冇咁易碎。所以好多嘢都睇你係羊群心態人信你就信，定係抱求真嘅心態去睇。理性判斷係好重要。」明白，下次有Uncle Send圖嚟，毛毛都會小心啲㗎喇！

天有不呃之風雲

陳嘉倩仲教路，只要做足功課，假嘅風暴消息係呃你唔到嘅！「以前做《天氣報告》要確保所有資訊都啱，特別打風要每半個鐘更新，嗰啲風向圖方位圖所有嘢都要自己不停上網搵料再砌。咁首先內容農場就無視啦，網上傳言即使報紙有報導都唔會理，主要睇天文台官方消息，同天氣顧問畀我哋嘅資訊。」

香港嘅天文台呢……「唔會淨係睇死一個嘅！會參考埋外國天文台。美國天文台都有香港資訊，有時佢哋早啲預測到香港打風㖭；香港有個天文發燒友組織嘅『地下天文台』都好有用。其實唔係淨係打風先開電視睇風暴消息，每個人平時都可以留意多啲氣象常識，因為你永遠唔知幾時有啲咩大颱風，平時睇開天文知識，風嚟到就會派上用場，唔會人講乜你就信乜囉！」

風起了，唯有努力生存

講到最尾，今次山竹呢個風咁勁，大家都要注意安全。「買定多少少嘢食喺屋企，打風嘅時候，梗係留喺屋企唔好出街啦。」仲有唔好落街追風、唔好叫外賣、唔好行近海邊……「至於打風之後，我暫時睇過覺得最有用嘅資訊，係打完風後十日內都唔好企喺樹下面！你唔知啲樹係咪仲穩固㗎嘛，為咗安全係要警覺少少。」

仲有唔好忘記打風仲要返工嘅人呀！「以前做主播返打風更要經過將軍澳大道，好深刻真係會見到啲樹斷枝飛落㗎車度，真係用生命返緊工㗎！其實打風嘅時候，每個仲要返工嘅人，都係用生命去為大家服務。特別係記者好似『MJ潘』（潘蔚林）咁，要出去採訪真係睇到人一額汗。打風時大家都喺屋企，或者有人祈求緊打風嘅時候，要記住其實出面係有好多人一直緊守工作崗位。」無錯！嚟緊打風仲要返工嘅人，務必注意安全呀！