無論佢暴露，定係事業心仁厚；佢低V，還是係受萬人俯仰，你都應該珍惜呢位朋友，因為佢一直默默照顧緊你嘅身心理健康，為全人類視力發展作出緊貢獻！所以下次除咗睇佢睇到硬晒（條頸）、送個Like畀佢、認同佢嘅理念請分享之餘，同佢講聲「早安，多謝，祝福你」啦。

而今日，性感長者界KOL夏蕙姨在大地晒條美腿，用行動話畀你知：一有自信，可以美麗。只要放開胸懷，你都可以Show自己最靚嘅一面畀人睇！佢嘅分享，唔知又有冇幫到你自信心起機呢？

愛靚唔晒命？

用對眼食雪糕，你鍾意我鐘意，夏蕙姨都好鍾意。「邊個唔鍾意睇靚嘅嘢呢？女仔都係鍾意睇，愛美嘛，每個人都鍾意睇㗎啦！我就最鍾意睇斯文高大威猛嘅靚仔，不過我其實一望會望個樣先，再望落底下。個樣好肉酸，身材點靚都吸引唔到我。」

所以如果你身邊有個又靚又成日慷慨大晒靚Body嘅朋友，鼓勵下佢啦！「露腿嗰啲好閒啫，個個做運動着短褲，條腿成日都露出嚟㗎啦！喇，露背脊露胸，露少少事業線嗰啲，咁就性感喇。性感啲冇問題㗎，例如隻腳靚，着短褲使乜驚啫？自己有咁靚咪晒出嚟比人睇囉。」

獻皺不如藏拙……

不過如果自問身材冇身邊Friend子咁好，或者，有自知之明都係一件好事。「靚就梗係要畀靚嘅方面人哋睇，但明知唔靚嘅，就唔好畀人睇！譬如你幾廿歲，個背脊好多皺紋，冇理由仲要露背㗎？咁咪盡量遮住佢囉。正所謂獻醜不如藏拙，唔靚嘅仲要露出嚟畀人睇，不如唔好露！」

「好似我自己覺得自己真係邊部分都唔靚，哈哈哈！呢啲係天生嘅，亦都冇辦法補救，冇計。但我發覺自己隻腳唔算醜樣，腳瓜唔係特別大，唔係話好似豬蹄咁。係矮（短）啲啫。」於是，經過深思熟慮之後夏蕙姨決定，今天，在大地晒條美腿！

想靚，心才正

其實沒有比較就沒有傷害，夏蕙姨話唔好下下同人比較，最緊要學識欣賞自己。「幾時都要有自信。你冇自信，就算你好靚，你都會話『人哋靚過我』㗎。又好似我80幾歲，靚極都唔夠啲18歲嘅後生女，點同人比呢？唔使比㗎。一山還有一山高，靚係冇標準同盡頭，你有幾多自信，就有幾靚。」Your faith your fate，多啲自信，所以美麗！

任何人都好，從今日起，唔好再話自己唔靚喇。「有啲人影相話『哎呀我好醜樣，唔影喇』，其實你影唔影都係嗰個樣，使乜驚啫？嗰個係你個樣嚟，點解要話唔靚啫？雖然我自己而家唔靚，但我一定話自己靚，呢啲係自信。而且有自信係唔需要（怕）人批評嘅。咪盡量將自己美嘅一部分去做到佢靚囉，即使我咁老，都會努力扮靚啲！」

你的樣子如何，你的內心未必如何

即使冇身材冇靚樣晒，放心，你一樣可以有好嘢拎到出嚟！「靚唔靚唔係在乎表面，係在乎你心地。心地好、對人好嘅話，人哋唔會因為我醜樣唔睬我；假如我靚但心地唔好、自私自利只顧自己，人哋唔會睬我㗎。有外在美固然好，但最緊要都係內在美。一剎那嘅靚唔係永恆，你心地靚，就可以永恆。永遠都係：你對人一分好，人哋對你十分好。」

乜唔係樣靚就大晒咩？「就算你表面幾靚，內心唔靚，都唔係大晒㗎！你對人唔好，冇朋友，靚有咩用？我年紀又大又一啲都唔靚，都可以去幫人，貢獻社會；有善心就會靚，我信㗎。相由心生係真嘅。」又啱，所以你身材好好嘅老友，可能內在美一樣咁靚！得閒記得欣賞埋喇……