萬億個為甚麼：政府點益自己友？

東大嶼人工島計劃一出，大家都覺得好有問題。錢唔係問題，但用太多錢肯定係一個問題。所以，不如聽下房產發展研究中心創辦人姚松炎博士點講，睇下可唔可以解答到你心入面嘅問題？

問：起個人工島真係要使成萬億？

應該係，除非唔係。姚博士幫你仔細分析埋：「政府到今日為止，從冇做過任何工程價格估算。目前所有價錢都嚟自民間估算同所謂『政府消息人士講』。但都可以拆開用單價做估算嘅。填海用市價每呎造價1300蚊嚟計，乘1700公頃就近2000億；計埋幾年後開工嘅通脹，成本大約2500億。」

加埋其他各樣，呢個人工島真係分分鐘使成萬億！「8條鐵路或車路，2000億係保守估算，加埋就接近4500至5000億。仲有島上建設：排水排污、建築物、道路……全部要錢。個島以100萬人口嚟諗，加多5000億都唔誇張。」姚博士補充，目前資料太少好難準確估算，但一萬億係合理嘅說法。

問：唔講幾多億，回唔回到本先？

回本唔回本，唔係一個question，因為都幾肯定係回唔到。「政府基建工程嘅成本效益分兩類，第一類係有冇利潤。好明顯人工島係冇，因為入面好多公共設施唔會收費，冇所謂盈利能力同合理嘅回報率。第二類就係改善民生、提供就業呢啲界外效益。而家國際流行一套叫Social return on investment (SROI)嘅方式，評估效益係咪抵償得到成本。我而家做緊嘅估算，係未必有呢個效益。尤其香港有其他土地替代方案，起人工島嘅機會成本自然更高。」

咁帶動經濟增長呢啲，應該有啩？但姚博士嘅答案係，應該冇。「2016年歐洲有篇文分析世界大型基建項目，指出呢啲項目唔能夠推動經濟增長。篇文用埋中國嚟分析，而2016年中國經濟狀況未轉差，已經有咁嘅結論，今時今日回頭睇就更加可信！透過大型基建工程去推動水泥、鋼鐵使用量，令GDP增加，盲目投入基建工程，其實係會使晒啲儲備，甚至搞到債台高築……」

問：回唔到本又使咁多錢，點解要做？

兩個字：利益。姚博士用佢一直研究緊嘅「旋轉門」理論嚟解釋：「旋轉門系統係指，首先賣地，賣地有錢就放入基本工程儲備基金，之後就用錢嚟起下一批基建，基建令地價上升，賣地又再賺多啲。林鄭嘅回應更加確認呢個睇法，佢係『為咗養住個行業，確保每年一千億繼續使。』呢個說法好得意，香港政府泵錢去養一個行業唔畀佢餓親？其他行業都唔會聽過，仲要呢個金額。」

「錢經過呢個旋轉門，變咗有好多相關得益者，形成一個集團。每年咁使錢，推高地價都在所不惜，就係為咗將呢啲利益瓜分。」咁赤裸裸？係。「咁多項目中，最令集團瓜分到最多利益嘅，就係填海。政務司講過未來會投放唔少過一萬億喺工務工程，呢個數係脗合，亦都係另一佐證。」

▲ 姚博士表示政府今次施政報告係「好大貪」。

姚博士亦指出，除咗人工島，今次施政報告入面有關房屋政策嘅改變同樣值得大家留意。因為過往香港係由房委會負責起公營出租房屋，但今次施政報告，政府將土地交畀其他合作伙伴例如市建局、香港房屋協會等非政府機構發展，變相搞緊公私合營。

「7成公營係呃人嘅！呢個「公」唔再係房委員嘅公屋。房委會起公營房屋，受到房屋條例同市民監察。但新嘅『公營房屋』，其實係搵啲我叫佢做『小金庫』嘅合作伙伴公私合營，不受法例同市民監管。到時有事，就好似港鐵沙中線咁，發現原來係奈佢唔何，完全無王管，想叫停都唔得！」

而呢個前所未有嘅大改變，最得人驚嘅可能係政府唔想你知！「佢成本施政報告都冇提。農地改名做「未被規劃作發展用途的土地」；公私合營就叫做「土地共享先導計劃」。重新包裝過，就係唔想人知，唔想畀人官商勾結印象。如果話人工島係明刀明槍，食你萬億；房屋政策就係暗渡陳倉。」一句總結今次施政報告：「香港政府今次好大貪，佢唔想畀某個利益集團留太大話語權，所以就兩邊做，幾千億亂派一通。以前千億已經好誇，今次再加多個零，但呢啲係市民嘅錢嚟……」

聽完之後你可能覺得好絕望，但姚博士話，都有嘢可以做嘅。「首先要令多啲人知情先。冇客觀數據分析就無從討論，流於情緒。有數據可以逼政府交出各樣估算。第二就係應該去支持肯用科學探究精神去監察政府嘅團體或者議員，多人支持政府係會驚！最後，有啲悲觀，就係等佢出事。因為佢地為利益而做，一定會做錯嘢，最後實會出事。人在做，天在看。」