2018年10月10日，歷史稱為「大填海日」。全港工程支出預計急升10000億﹗

而其實香港大倒錢時代一早開始咗。高鐵884億、沙中線971億、港珠澳大橋1200億、三跑1415億，倒完又倒，倒完又倒……由小倒疑情（懷疑有內情），到大倒傷金（傷埋子孫啲金），你發現呢個根本係有預謀咁將大家啲人工倒落海嘅計劃。呢刻你被逼著發出最後的吼聲：快啲收手啦！

大佬，點解香港搞成咁？呢個問題邵仲衡都想問。佢同每個香港人一樣，只可以睇住自己啲錢畀沉迷白象嘅大佬係咁倒落海，慘變大倒孝﹗唔通，香港真係要等另一個「大奇蹟日」出現，先可以得救？

是技術性填海，不要怕

經過大填海日之後，「大佬孝」邵仲衡雖然係咁叫自己不要怕，但講真，點會唔怕？「根本完全唔合理，乜都唔講然後就話做！喂，香港一年打幾多個風，天鴿山竹嗰啲吹到應㗎喎。又睇下杜拜咁有錢，（部分人工島）而家都沉。仲有好多嘢……多咗人口，咁學校、教育？醫療呢？而家公立醫院都已經逼到死死下。做嚿咁嘅嘢出嚟，點解呢啲實際嘢乜都唔講？講嚟講去都係遠景願景呢啲好虛嘅嘢。」

望住咁「技術性」嘅填海計劃，大佬孝心中只怕都發出咗無數句吶喊——大佬，How？「你見啲宣傳，『好多辦法裡面，呢個係唯一適合嘅方法。』擺明夾硬嚟嘅。點解唔諗下替代方向？哥爾夫球場、棕地，有現成嘅地可以傾下點用，點解要一下子做個新島？大家明咩意思囉。（利益輸送？）估都估到啦。」

真正會開心笑的又有多少人呢

而其實to填or not to填，香港人今日開唔開心早已經唔係a question。「8、90年代開心㗎！真係冇失業率，朝頭早擘大眼，就係想早啲返公司工作搵錢。嗰廿年係開心到想快啲天光㗎，個個都開心：『嘩！香港樣樣嘢都咁好！』。而且嗰個時代你見到唔合理嘅嘢，政府會幫你框返正佢，等條路啱返；或者有啲人偷偷摸摸做咗啲衰嘢，就會即刻『砰』一聲撥開佢。」聽見都開心啦，可惜這些機會不是……

「至於喺2018年呢刻，其實我係幾唔開心。以前就聽人講，但而家自己都經歷到，每一日都唔想聽到、唔想睇到新聞㗎。每日都太多嘢唔合邏輯，你會覺得好厭倦。即係例如冇理由拉啲為自己前途奮鬥嘅後生仔去坐監、冇理由去做啲捨本逐末嘅嘢、避談內容只講動機㗎嘛……」明，大家真係明。

我相信明天是大奇蹟日，我相信明天好景

之不過，當你感到還不夠絕望尚可更絕望，大佬孝話你知，希望可能真係在明天。「而家雖然係最壞嘅時代，但都可能係最好嘅時代。點樣將今日變成最好嘅時代？我覺得係堅守自己嘅態度，用你嘅形式去喺今日做個（好嘅）香港人。唔喜歡嘅嘢要繼續唔喜歡，見到唔啱嘅事就要出聲。呢樣嘢好重要。」

出聲？咁嘅時勢會唔會畀人滅聲、捉去填海㗎……「倪匡先生有句說話『雖然條魚被擺喺砧板上，但就死條尾都發下發下啦，發到你頭暈眼花、個身濕晒都好呀﹗唔通攤平，呼出最後一口氣畀你刴呀？就算係垂死掙扎，都要掙扎！』」真係有用咩？「好多嘢出嚟嘅效果你估唔到，社會係人組成㗎嘛。投票，就算一邊明一邊暗，你輸晒，都失驚無神會有發叔唔知醒㗎嘛？咁講你明㗎啦！而且今日唯一慶幸嘅係有互聯網同各種通訊軟件，真相唔再係咁容易去掩蓋㗎咋！兵來將擋囉。」

十八年後就是一條老漢

錢又（畀人）倒晒，人又老晒。孝哥話最好唔好畀呢件事發生。「後生仔千祈唔可以灰心。你哋係畀我哋更有本錢去唔灰心嘅。我哋啲6、70後傷心往心裡流，但你哋唔需要向心裡流，Speak out！佢哋奈你唔何嘅。你一定會有辦法搵到自己條出路，there is a way。一條罅，放粒種子落去，你想佢唔生？落兩場雨佢又生㗎喇。」原來即使冇錢，但後生都係本錢嚟，大佬，明白了！

「輸左，咪第二朝起身又係一條好漢，再打過囉，又嚟過囉！我最近拍嗰套戲《逆向誘拐》，都係講呢樣嘢，就係大家其實都係想生活喺一個覺得係有希望或者係開心，令到自己身心健康嘅地方。呢樣嘢係各個年紀，無論係60、70、80、90後甚至係千禧世代，都想追求嘅嘢。身為香港人一分子，我知而家做香港人真係要好堅強，但你哋得㗎！」