好消息！總有一日你以後唔使再返工喇！不過壞消息係可能要等到你死嗰日……
打完超強颱風，返工；地鐵4線癱瘓，返工。對打工仔嚟講，晴天陰天雨天只要係上班天，天留我？不留！諗住無論塞車定壞車，總知返到工就係好嘢！然而當佢有佢嘅幹活，你有你嘅忙碌，遲到一日之後嘅某一日你哋發現原來……冇咗勤工獎？
今時今日，連港式英文都衝出國際畀人認可，但港式平民打工仔依然未見出頭天。打不死嘅打工仔歐瑞偉見到咁，除咗講聲Add oil之外，都唔知講乜好了……
返工 is 賣 Favourite？
賣晒珍貴嘅時間（甚至尊嚴）嚟換錢好辛苦？最慘可能係好似瑞偉哥咁連命都要賣埋！「我做武師入行，讀埋邵氏藝員訓練班就入電視台做替身，替演員撞車、吊威也，做危險動作。當時80年代電影好盛行，如果你唔做，好快被淘汰！『唔得？搵第二個囉。』你話唔得就冇㗎喇，生存唔到！」即係想快樂過生活，要拼命去生存啦……
「所以一返工，人哋問你『得唔得？』，唔得都一定要話得！」但老細成日畀埋晒啲mission impossible，點頂？「呢啲實有嘅。好似武術指導叫我幾樓跳落嚟；又或者汽油彈喺你側邊爆……走遲啲真係火燒人㗎！唯有硬住頭皮囉。受咗傷係會腫會瘀，但好多時做做下，咦？又得喎做到喎。滿足感就會嚟。」
做 Die me……
Blow water咩﹗份工悶到癲嘅話何來滿足感？瑞偉哥話明，佢真係明。「嗰時19歲我返第一份工，去我哥哥間餐館度幫手做打雜。一朝早就要起身淋芽菜，跟住洗碗洗碟、穿沙爹（串燒）、燙下餐巾洗下廁所，乜都要做。嗰時做咗大概一年半，但基本上我第二個禮拜我都想走㗎喇！」
弊在好多人返一日工都想走！「我當時心態都係接受唔到呢種生活㗎！19歲嗰時好鍾意周圍跑周圍去，咁你困喺一間餐館裡面，由朝早一起身做到夜晚成十點幾鐘，呢種生活日復日，夜復夜，我覺得真係好枯燥。」返工放工，幾點至夠鐘……I agree with you，枯燥me too。
Long time no 知。
不過瑞偉哥溫提，返工係辛苦，但有啲嘢都要留意返：「最緊要搵到你鍾意嘅職業，如果鍾意份工，每日返工都唔會覺得太辛苦；但如果你對嗰樣嘢完全冇興趣，你會覺得好似一起身就要返工，一起身又要返工……真係唔大興趣，都盡量開心啲做啦，開心又要做，唔開心要做，點解唔開心去做呢？」
咪拎自己同唔使做嘅Old seafood或者Hea爆同事比較，呢樣都要知，咪你實No eye see。「贏在起跑線嘅人實有嘅，問題係，佢哋係咪永遠都會咁呢？唔努力嘅話，他日佢一個唔好運就乜都冇晒。靠自己努力得返嚟先係最重要。」至於一夜上位呢家嘢，不要去羨慕，諗都唔好諗。「呢啲心態好似『中六合彩變千萬富翁』，有只係額外，上天畀你咁好彩。但有幾多個咁嘅人呢？唔多囉。等下囉……可能有排等。」
Collect 錢！
無論如何，返工辛唔辛苦有冇樂趣都好，Add oil！「辛苦都冇辦法啦，喺呢個社會，我覺得生存係要拚勁嘅。天唔會突然跌嘢落嚟畀你拎，一定要靠自己。當然，付出幾多係咪就代表同等咁收返幾多？呢樣係絕對冇可能嘅事。但付出我信係有回報，未必即時畀你睇到，但好多嘢梗係做咗先講。」
同為港式平民打工仔，瑞偉哥最後勉勵大家記得Try our breast，挺起胸膛頂硬上。「我唔敢講一定成功。但你盡量去儲多啲料同經驗，終有一日會用得著，畀人賞識嘅。我地香港人係有打不死嘅精神㗎嘛！辛苦？每一個打工仔一定辛苦㗎啦。唔辛苦，點得世間財？」收到，Thanks very much﹗
