2019年上半年，東方昇經歷咗人生嘅低潮。低到，佢跌低咗，再企唔返起身。

嗰段短短兩個月嘅低潮，伴隨住東方昇嘅，係孤獨。佢又點會諗到，一隻被人揸住嘅痛腳，會成為佢停工嘅最大原因。

 

回想當刻，佢因為呢個痛腳，仲被人搞到雞毛鴨血。最後甚至因為呢個風波，被送入醫院。今日佢搵到佢一個值得相信嘅朋友楊鼎基醫生，終於令佢敢放下傷痛，將呢段痛悲往事公諸於世。

【東方昇、絕密、痛腳】

 

東 - 東方昇   楊 - 楊鼎基醫生

 

東：醫生，上年，我有隻痛腳被人揸住，揸住嗰個，仲要係醫生。卒之令我停工三個月，仲入埋醫院。

東：今日我想同你分享一下，呢段悲慘往事...

東：喺一個月黑風高嘅夜晚，我攞住張戰帖、帶領住十位足球界嘅鉅子，包括西灣河朗尼、大坑夏薩特、元朗大巴拿等球星，去迎戰我哋球隊嘅宿敵。話晒都係十八區明星隊，對住啲野雞隊就梗係連Gear都唔使上，費事顯得太大陣仗。同埋呀，無帶Pad上場跑都跑得快啲。

東：點知去到半場，唔知對面嗰個著住尼馬波衫嘅光頭仔係咪妒忌我太靚仔，喺我帶波嗰陣一嘢飛剷落嚟我粗過石油汽罐嘅小腿，我見佢痛到孿咗喺場入面，正想笑兩聲嘅時候，我發現，我都痛到出唔到聲...

東：然後入到醫院，我發現我嘅痛腳被人揸住嗰，嗰個仲要係醫生！

東：因為，我隻腳真係斷咗...

 

楊：哦...

楊：多數啲無乜肉嘅位，撞落去嘅Impact都大啲嘅...

楊：呢啲就係急性運動創傷...

 

東：點解醫生你咁冷靜呢！我嘅痛腳經歷喎！仲要係急性運動創傷，聽落同我個心一樣咁傷喎！

楊：哦...其實急性運動創傷有好多種嘅，運動整親又係，好似你咁用腳食麵拗親都係。

楊：去睇醫生，最緊要跟返醫生診斷做返治療，就OK㗎喇。

東：聽楊醫生咁講，好在我呢隻痛腳有醫生幫我揸一揸，如果唔係可能仲慘呀！

 

【醫生也斷腳】

 

東：講起踢波，醫生你做運動時又有無好似我咁受傷過呢？

楊：幾年前有班骨科醫生一齊踢波，十一個人踢波，有一半曾經係有運動創傷，斷過十字韌帶嘅。

東：嘩，骨科醫生自己都斷腳嘅。。

東：明嘅，植髮嗰啲醫生都有地中海嘅...

 

楊：我諗大家平時都無乜做運動呀，落場踢波以為自己好似好勁...

東：係囉，以為自己係C朗咁勁。

楊：然後，左扭右扭，一「啪」咁就斷咗。

 

東：呢啲創傷連醫生都好難避免呀？

楊：係㗎，好多時候大腿肌肉四頭肌唔夠力又唔覺，突然間想轉向嘅時候咪會斷囉。

楊：所以十字韌帶其實多數係自己扭斷嘅。

 

【斷過十字韌帶嘅都係天王級！】
 

東：咁做開運動好Fit嗰啲，又係咪少啲機會有運動創傷呢？
 

楊：好似近排好Hit嘅郭富城，佢幾年前開世界巡迴演唱會時都斷過。
 

東：唔係呀話，佢跳舞咁勁，Generation Next喎，成條腿都係肌肉都要斷！

 

楊：所以要斷你都避開唔到㗎喇。

 

東：如果我斷咗同郭富城嗰啲同個Level，我Ok㗎。

 

【極度容易受傷的腳仔】

 

東：好似玻璃心有樣睇咁，有無啲咩人係特別容易受運動創傷嘅呢？

 

楊：唔夠熱身運動，同埋突然間話要做運動嗰啲人。

楊：你知而家都陸續開放返啲運動場地，去打波前乜都唔做咪受傷囉。

楊：同埋啲年紀大嘅人，佢哋多數無乜為意要時常郁動，就容易啲受傷囉。

 

東：咁你喺醫十字韌帶上面有無啲咩有趣嘅經歷呢？

 

楊：其實，都...無嘅，都係咁醫㗎啦。

楊：反而，好多人受咗傷時都會好心急，呢啲唔急得㗎喎。

楊：急性創傷，隻腳仲係好腫嗰時做手術，有機會生啲疤喺度，影響日後康復。

楊：其實要等啲肌肉消腫囉，急唔嚟嘅。

 

東：唔係喎，我聽過有個講法係叫延誤治療嘅，點樣先算醫得太遲呢？

 

楊：病人最緊要去睇醫生、先有個診斷，然後跟返醫生個治療方式就OK，喺未太影響到日常生活前求醫都唔算延誤。

 

【創傷寶寶要補補】

 

東：我整親腳嗰陣，我阿媽喪煲雞腳畀我食，食到我發夢夢見斷咗嘅腳變咗雞腳。

東：我又想代我阿媽問個問題呀，食多啲雞腳係咪真係快啲好呢？

 

楊：我都知你會問呢個問題，我都準備好咗。

 

楊：西醫就無咁嘅講法嘅，不過中醫，我就知道佢哋有說法係食鹿筋呀、牛筋呀嗰啲。

楊：佢哋都講緊個概念，其實係含有骨膠原食物嘅會有助痊癒。

楊：而家嘅營養產品都有骨膠原沖劑，溝啲果汁飲，都宣傳自己有相同效果。

 

東：我又代林日曦問下呀，䟴腳又會唔會對啲骨有幫助呢？

 

楊：Er...係無嘅。

 

東：咁壞處呢？

 

楊：可能型啲囉...

 

有痛腳畀人揸住，又唔使驚嘅！只要你搵返一個值得信任嘅醫生，痛腳其實好小事！

 

唔想痛腳成為你人生污點，又想好好享受運動嘅樂趣，唯有將楊醫生嘅教誨袋落袋，記得做運動前要做好熱身、唔好吽得太耐突然做好劇烈嘅運動，好好保護自己，先可以長做長有。尤其是抗疫留喺屋企嘅大家，至少都忍咗三幾個月，做運動記得循序漸進，暫時放過你個肚腩仔，唔好咁狠做咁激烈嘅運動，等身體慢慢恢復返，再操爆佢都唔遲呀。

 

仲有，好似東方昇咁唔好彩受過傷嘅，只要好好聽教聽話，跟據醫生嘅診斷做治療，相信大家好快都可以做返自己想做嘅事。城城可以繼續Generation Next，東方昇都可以繼續挑戰公仔麵用腳食。運動創傷只要處理得妥當，每個人都可以喺人生路上再出發，重拾想做嘅事！