呢位天才小學生Ben細細個就做咗Youtuber，拍片嗰時已經有1個like咁多啦！見到呢位咁清澀嘅Ben仔，不禁令毛毛都諗返起那些年嘅青蔥歲月。學Ben仔話齋，註冊咗Google帳號就有Youtube，照咁講，要做一個Youtuber，其實唔難，而要做一個成功嘅Youtuber呢？其實都唔難，你睇返歷世歷代曾經風靡一時嘅例子就可以搵到成功嘅軌跡喇！

英文教育界

當年末代會考嘅時候（吓？會考？食得㗎？），呢位考生Ruby不惜奉獻佢溫書嘅時間，都去Youtube拍片教人講英文，相信當年嘅同學仔都一定會記得佢超純正嘅FXXK英語發音教學！

九唔搭八界

2010年因為九唔搭八系列上位嘅Eminleo，都算開創咗吹水拍片嘅先河。可能佢智慧太高，佢講嗰條咩超人嘅公式，毛孩我到今日依然未夠悟力明白……

玩電話界

如果你以為Youtuber一定係後生細仔，少年你真係太年輕，阿Lou記叔叔人生閱歷深厚，由撥輪電話到大哥大到i瘋都略有研究（好似係），抛返少少書包教吓你班後生仔點樣用電話，就上位鳥。

煮飯界代表

想學返幾道能手小菜，唔使一味落雞汁或者食平啲啲啲啲啲啲嘅，CookingHayHay深明香港人對食同生活嘅態度：簡單得嚟有少少複雜、複雜得嚟暗地裡其實又簡簡單單，咁先呃得到人嘛。加上閒時影下大家當正係心肝寶貝嘅貓貓狗狗咁，咪做到Youtube幫煮囉！

化妝界代表

講化妝一定要講到Mary姐，一個女仔就咁化妝畀你睇唔夠過癮，一路化妝一路爆粗先夠震撼嘛！

魔法少女界

睇魔術片，識睇一定係睇穿崩位（好似係）。男人老狗穿崩冇乜睇頭，最多咪畀人哋笑兩笑，之但係女神變變變又唔同講法嘞，重點係每睇到一個穿崩位就話會除一件衫喎，毒L仲唔捕實個Mon？

打機界元祖

達哥係香港打機拍片界嘅元祖，打機打到喺2011年開埋台，晚晚九點半成班毒男自己有機唔打，開掣睇達哥打機，平均有成7000人睇直播，可能一班人一齊打機有快感啲啩，hehe。