而家啲小朋友，喺港爸港媽嘅栽培底下，視野真係唔同啲。有小學生就化身成小記者，講出一啲又唔知震驚幾多億人嘅結論。

你睇下，班記者仔真係冇呃你㗎。一大清早，班水貨客就為大地帶來極多紙皮啦！

除咗益咗班呀婆之外，水貨客亦都振興咗香港嘅再造紙業。冇佢哋留底咁多紙皮，香港啲再造紙廠一早執晒啦！

仲有呀，香港一班畀政府外判咗又低人工又冇福利嘅清潔工人都係靠晒班水貨客㗎！你估佢哋淨係留底紙皮咁孤寒咩，佢哋仲留底勁多膠袋啦索帶啦，一地都係㗎，點止淨係關照啲呀婆喎！

全靠啲水貨客，香港人先有錢搵，有飯開。班水貨客每日留低咁多紙皮，如果你細細個就開始執，就真係自細執紙皮，大個買地皮喇。