就快又到區議會選舉喇，出名有效率嘅禮義廉當然要日日擺街站，留住選民嘅心啦！不過噚日喺葵涌就發生咗場禮義廉大戰街坊嘅戲碼，成地花生，有排執呀！

因為拍片嗰位街坊個女之前一句撻著咗禮義廉嘅社區主任郭芙蓉同李世隆，仲畀佢哋影埋相，咁呢個街坊咪代個女嚟「見家長」咁囉。點知見見吓，禮義廉小芙蓉都未出過聲，就忍唔住喊喇。究竟個女女講咗句乜嘢咁大威力？之唔係一句「蛇齋餅」之嘛。唉，咁又唔怪得小芙蓉喊嘅，禮義廉出名福利好，又為民生著想，點只得蛇齋餅三樣咁少呀！仆心仆命仆X咁送咁多粽、米、糧油、廁紙等等呢啲日常用品畀你哋，你剩係話人「蛇齋餅」，就梗係委屈豬啦！係囉，加多兩滴眼淚，畀多幾錢肉緊！好多街坊睇住㗎！

仲有另一個街坊，睇完佢哋張單張之後，開心些牙埋畀阿流肛華睇啦，呀，點知咁又撻著咗小芙蓉。你又係嘅，人哋一番心意派畀你，你做乜走去轉發畀流局長呢？爭唔落囉，你係想同流局長些牙嘅，就明張目膽問人哋攞一疊有誠意啲嘛。另外，大家唔好遺忘咗呢個義工婆婆呀，佢非常之盡責，一直挺身保護住喺後面喊緊嘅禮義廉小芙蓉，仲係咁問拍片個街坊：做咩蝦仁！做咩蝦仁！嗯，臨時演員都係演員，霞姨今次做到嘢！黨會見到你哋嘅努力㗎喇！加油呀！

資料來源：Sharon Ho