吸毒真係影響一生，唔止會搞到你連自己個仔姓咩都唔知，如果你喺娛樂圈度做仲會星途盡毀㗎。早幾日，日本就爆出演員成宮寬貴嘅吸毒相，好多妹豬真係心都碎埋呀⋯⋯不過，有一個摩擦力驚人嘅妹豬，就發現真相好似笨唔係咁喎！

妹豬喺呢幅懷疑吸毒相圈咗三樣嘢，就係膠兜、包裝袋同粉末。你串連到未呀？叫咗你睇多啲名偵探死神學下嘢㗎啦，呢位妹豬一睇就覺得事情並不單純，好明顯唔係吸毒咁簡單，一定係製作緊啲高濃度同要小心處理嘅物品！

謎底已經解開喇，佢咪就係整緊雪糕食玩囉！呢隻食玩嘅奧妙之處就係要將粉末狀嘅糖整成唔同嘅造型，喺日本同香港都好受歡迎㗎～睇落又真係幾似喎，有三角形窿嘅長方膠兜，銀色嘅包裝紙，白色粉末，仲有最重要嘅清水！

有好多網民都話如果係就好喇，因為佢哋都唔想一個有前途嘅演員咁就玩完。你都可能會諗，如果係做咩成宮唔照直講出嚟呀？即係咁，一個大男人凌晨3點同班fd子喺屋企，喺度玩埋晒啲咁卡哇依嘅糖果食玩，仲要玩得咁開心，畀人知原來佢咁有少女心，真係同吸毒一樣形象盡失呀！

封面圖片及資料來源：＠sayamicyun／twitter