唔好以為喵星人高高在上就淨係識得歎世界，食下瞓下爪下梳化就一日呀，其實佢哋收得貢品多，間唔中都會賞賜返啲小禮物畀奴才，多謝佢哋咁盡心服侍自己嘅～

不過喵聖上同古代啲皇帝好唔同，唔會賞賜埋晒啲咩黃金千両咁土豪或者絲綢千匹咁唔實際嘅，喵聖上一出手，梗係送草蜢，甚至老鼠仔啦！得到喵聖上賞賜已經要感恩，仲要係佢親自打獵返嚟，奴才真係要好好收藏啲寶貝呀。

「嗱，草蜢就可以跳舞娛賓，老鼠仔就可以用嚟浸酒，唔好話朕對你唔好喇喵。以後一心一意服侍朕喇！」

唔知喵星人係咪見人類對佢哋嘅小禮物唔太欣賞呢，今次竟然一改作風，送大大張銀紙畀奴才呀！話說呢隻叫做小橘嘅喵喵其實係半隻流浪貓嚟嘅，點解話係半隻呢？因為佢試過三次畀附近居民帶返屋企，但佢都會好唔適應，大家唯有放棄將佢收編啦，不過就有定時餵佢食罐罐同埋幫佢點藥驅蟲嘅～

唔知小橘係唔係知道大家愛錫佢，所以特登返兼職賺錢錢報答大家呢？不過收到呢份大禮嘅網民就話，貓貓執到嘅錢算係偏財，唔會自己袋咗去咁大貪，會用嚟買罐罐畀附近嘅流浪動物呀～咁有愛心，唔怪得小橘主子都要畀個like你啦！

封面圖片、資料來源連結：邱政輝／貓咪也瘋狂俱樂部 CrazyCat club、周庭妹／貓咪也瘋狂俱樂部 CrazyCat club、壞貓咪柯小橘