狗係人類最好嘅朋友，但係有好多人唔止當狗狗係朋友，簡直係當正自己仔女呀！做阿爸阿媽最開心嘅就梗係將自己仔女啲叻嘢得意嘢同全世界開心share啦，所以好多主人，如果見到自己嘅狗狗識啲絕技都會帶佢哋參加比賽，話唔定仲會一夜成名?啵！

好似英國名犬大賽Crufts，年年都有好多狗主會帶埋自己個心肝椗嚟參加㗎，隻隻狗狗都身懷絕技，分分鐘仲叻過人類呀！今年有個表演睇到全場觀眾下巴都跌埋咁滯，段表演片段仲喺FB爆紅?！

佢哋就係Lusy同Deril喇～著軍裝嘅主人Lusy同埋醒目嘅德國狼狗Deril就咁睇已經夠晒台型啦，但係Deril笨唔係普通嘅狼狗嘅簡單，佢唔止識叫主人起身同左右左右咁步操，仲會同埋主人一齊做體能訓練㗎！深蹲呢啲濕碎啦～

做Sit Up冇人幫你撳住對腳？Deril幫到你，唔止幫你撳住，Deril個頭仲會跟住你一齊上上落落?！唔怪得Deril咁粗壯啦條頸！你以為咁就完？話晒都第二名，你估浪得虛名㗎？

原來Deril嘅殺手鐧係幫主人做CPR（心肺復甦法）呀！主人扮畀手榴彈炸到暈咗，Deril就係咁用雙掌撳落去做心外壓，間中又舔下主人，keep住咁做直到主人醒返為止呀！

Deril仲要細心到怕主人醒咗會見凍，即刻咬返張氈畀主人披返先，狗狗體貼成咁，唔怪得之咁多女神都鍾意養狗啦！睇到Deril係咁撳，毛毛都好想撳埋一份⋯⋯I mean撳掣share段片呀！

封面圖片及資料來源：Crufts／Facebook