相信唔少地獄黑仔王都有唔見電話嘅經驗。

通常嚟講，當你發現自己唔見電話，第一時間你都係會搵第二部電話打畀自己，睇下會唔會咁好彩部電話就跌喺自己附近，又或者睇下部電話會唔會畀好心人執咗，可以聯絡對方拎返部機咁嘅。之不過呢個世界邊得嚟咁多好心人吖，好似今次呢位台灣網民嘅老竇就冇咁好彩喇！

話說，呢位台灣網民嘅老竇就喺火車上面唔見咗部電話，跟住咪同大家一樣試下打畀自己囉，點知打極都打唔通⋯⋯ok fine！咁唯有當而家連個天都想自己出過部新機啦⋯⋯

天網恢恢，肥而不腻！當呢位網民幫老竇部新機同步帳號嘅時候，佢竟然喺google drive搵到執到老竇之前部電話嗰條友⋯⋯嘅自拍喎！望住呢埋loop極都仲有嘅自拍，呢位網民表示：「我該繼續偷偷關注他的生活嗎？」

即係咁，雖然呢條友仔執到人哋部電話都唔畀返人好似幾衰仔咁，但毛毛睇完呢堆loop極都仲有嘅自拍之後就明白⋯⋯其實唔係條友唔畀返部電話人，係部電話自己選擇跟住呢條咁鍾意自拍嘅友仔呀！你哋話嘞，呢位網民嘅老竇會唔會好似呢條友咁影咁多自拍先？就算會呀，呢位網民嘅老竇又識唔識擺咁多甫士先？而家人哋連遮雙下巴嘅V字手勢都識做，你點同人鬥呀⋯⋯（應該係，除非唔係）

資料來源：感謝網民 張承 同意轉載