雞肉同肌肉你揀邊樣？唔准諗，即刻答！傻豬嚟嘅，梗係兩樣都要啦！唔食雞肉點補返啲肌肉呢？但係雞呢家嘢真係好講火候㗎，特別係雞胸嗰個位，如果煮到過咗籠，個雞胸就會又嚡又Dry，點哽呀！

咦？呢個咪係《狂野時速》嗰個阿Dom？今次名副其實真係渾身都是雞肉！嘩～好Juicy嘅胸呀⋯⋯見到都想咬佢一啖呀！想咬邊個個胸？梗係講緊隻雞啦，55，一定係！

係咪覺得個畫風好熟口面呢？之前咪有個神手用朱古力醬畫咗狼人曉治積曼出嚟嘅～係呀，又係佢呀！用朱古力醬同果醬畫畫對於佢嚟講濕濕碎啦～而家佢用黑椒都整到雲迪素出嚟，仲邊夠佢玩呀？

冇鵝蛋面唔緊要，有雞蛋面型都幾靚呀～連烚蛋都可以畀你畫個到靚女上去，啲女都畀你溝晒啦！

平時見佢用調味料嚟畫畫已經夠高難度㗎啦，而家仲要喺唔同嘅食物上面畫，又要遷就返個食物嘅形狀，畫嗰陣又要留意食材表面個質感會唔會影響幅畫，真係唔簡單呀！睇完佢啲作品就完全明白晒咩叫做食物都係一種藝術喇！

封面圖片及資料來源：Septagram果醬畫世界