紋身真係唔可以亂紋㗎，因為紋咗就一世㗎喇。紋自己條女個名不如紋自己個女個名好過啦！自己個女肯肯定唔會變吖嘛（如果佢唔走去改名嘅話）。

不過英國呢位仁兄千算萬算都算漏咗一樣嘢⋯⋯原來紋自己個女嘅名上身，同投資一樣都有風險㗎⋯⋯

望落個紋身都幾靚呀，又冇串錯字，又冇寫錯生日，有咩問題呀？問題就係，個女原來唔！係！佢！親！生！㗎！

呢個咁不幸嘅「爸爸」叫Jamie，係歌手嚟㗎。有次一個同佢有過幾夜情嘅女人Morris打畀佢話自己有咗，仲話驗咗DNA話個女係佢㗎喎！Jamie哥開心到喊呀，就連當時車緊佢個的士哥哥都話唔收佢車錢當賀佢喎～

Jamie哥作為有膊頭有腰骨嘅男人，就算個女人唔想同佢結婚，佢都肩負返做爸爸嘅責任，供書教學之餘，一個星期仲會照顧返阿女幾晚，做下Family Man咁，真係好Sweet呀！

不過女呢家嘢，都係Check真啲好，佢見哎吔老婆差唔多成年都唔拎份DNA報告佢睇，咪自己帶個女Check下囉，點知Check完真係心都碎埋呀！原來個女唔係佢㗎，枉佢仲紋埋阿女個名上身?！

傷心嘅Jamie哥唯有將個女還返畀Morris同佢現任老公啦⋯⋯Jamie哥話雖然張出世紙仲係寫佢係老竇，個女臨走之前仲Daddy、Daddy咁叫佢，但係佢好清楚知道呢個女已經唔屬於佢㗎喇⋯⋯而個紋身嘅存在就好似每日都恥笑緊佢咁呀。

今時今日Jamie哥仲Keep住個女留低啲嘢唔捨得掉，就證明其實佢仲好鍚同掛住個女啦！相信阿女第時大個知道呢件事，都會好感激呢個曾經咁鍚佢嘅哎吔阿爸㗎。Jamie哥唔好咁傷心喇，話唔定你下個生嘅都係女呢，到時改返同一個英文名咪得囉～

封面圖片及資料來源：Liverpool Echo