BB仔出世之後，身邊所有事物都未見過，對佢嚟講都好有新鮮感，梗係一學識行幾步就通屋走，想咩都掂下玩下啦～但係阿B周圍跌跌撞撞都好易發生危險㗎，好彩而家有家居塑膠圍欄，擺喺廚房廁所門口就唔驚阿B衝咗入去啦～

不過咁，明明都冇做錯事，無啦啦畀爸爸媽咪圍住個感覺又真係幾慘豬嘅～台灣呢個阿B畀親爸爸媽咪圍住，冇得周圍探險就會開始喊喊，叫爸B點專心做嘢呀？唉，做老竇嘅，仲有得點呀，唯有反客為主，用圍欄圍住自己個小小嘅工作area啦……

成日都話唔好畀老竇自己一個湊小朋友，可能係講緊老竇收工仲要睇住條化骨龍會攰到散晒啦。媽咪出一出去買餸返嚟，竟然就見到老竇蛇王瞓晏覺喇！平時返工揸流灘都算啦，你連湊BB都揸？！不過見到佢圍住自己得返個咁迫嘅空間瞓，又係嬲唔落嘅～咁多位老竇係咪都諗住返去試下圍住自己有咩感覺呢？唔使咁煩啦，乜你唔記得咗香港啲屋已經迫到好似畀人圍住咁喇咩？

封面圖片、資料來源連結：Wen Chen Tsai

延伸閱讀：【阿媽真的崩潰了】老公驚B女畀蚊咬 竟然將佢放入模型玻璃箱